देउवा भन्छन् : पार्टी बलियो भए गठबन्धन गर्नै पर्दैन नि !

९ माघ, पोखरा । नेपाली कांग्रेसका सभापति शेरबहादुर देउवालाई पार्टीलाई बलियो बनाए गठबन्धन गर्नै नपर्ने बताएका छन् । पोखरामा मंगलबार कास्की जिल्ला समितिको सम्मेलनलाई संबोधन गर्दै देउवाले पार्टीलाई गठबन्धन नै गर्न नपर्ने गरी जिताउन आग्रह गरेका हुन् ।

सम्मेलनमा केन्द्रीय सदस्य प्रदीप पौडेल, गुरु बराललगायतले गठबन्धनका कारण पार्टीका इमान्दार नेता कार्यकर्तालाई अन्याय भएको बताएपछि देउवाले जित्नका लागि गठबन्धन गरेको जवाफ दिएका हुन् ।

‘नेपालको संविधानअनुसार कुनै पनि पार्टीको बहुमत आउन सक्दैन । बहुमत नआउने भएपछि गठबन्धन गर्नैपर्ने हुन्छ । गठबन्धन गरेर जाँदाखेरि समस्याहरु छन्, हाम्रो पार्टीमा’, देउवाले भने, ‘गठबन्धन नगरी जित्ने पार्टी बनाउनुस् न ! गठबन्धन गर्नैपर्दैन नि पार्टी बलियो भए त । तर, गर्ने के ? पार्टीले जित्नुपर्‍यो नि ।’

सत्तामा जानका लागि पनि गठबन्धन गर्नुपर्ने अवस्था रहेको देउवाको भनाइ थितयो । ‘पहिले शेरबहादुरले बिगार्‍यो, बिगार्‍यो भने पछि लिएर आएपछि चाहिँ… सत्ता सबै हिसाबले आवश्यक छ । संसारभरि नै सत्ताका लागि मारामारी छ, चुनाव भइराखेको छ’, देउवाले भने ।

कास्कीका जिल्ला सभापति किशोरदत्त बरालले राजनीतिक प्रतिवेदनमा समानुपातिक निर्वाचन प्रणाली खारेज गर्न माग प्रस्ताव गरेका छन् । तर देउवाले भने नेपालमा समावेशी, समानुपतिक प्रणाली आवश्यक रहेको बताएका छन् ।

‘समानुपातिक, समावेशी संविधान छ । भारतमा बल्ल महिलाहरुलाई संरक्षण गर्ने कुरा भइराखेको छ’, देउवाले भने, ‘पालिकाहरुमा अध्यक्ष, उपाध्यक्ष, मेयर वा उपमेयर महिला हुनै पर्ने बराबर अधिकार छ, कुनै पनि देशमा यस्तो व्यवस्था छैन ।’