कतारी राजालाई हात्ती उपहार दिने योजना के हो ?

१० वैशाख, काठमाडौं । कतारी राजा (अमिर) तमिम बिन हमाद अल थानीको नेपाल भ्रमण सिलसिलामा नेपालले हात्ती उपहार दिन गरेको तयारी तत्कालका लागि कार्यान्वयन नहुने देखिएको छ ।

तत्कालीन राष्ट्रपति विद्यादेवी भण्डारीको कतार भ्रमण क्रममा २०७५ सालमै नेपालले कतारलाई हात्ती उपहार दिने प्रतिबद्धता जनाएको थियो । यो प्रतिबद्धता राजा अल थानीको भ्रमणका बेला कार्यान्वयन गर्ने सरकारको तयारी थियो ।

तर, कतारकै तर्फबाट आवश्यक तयारी पूरा हुन नसक्दा राजाको भ्रमणकै सिलसिलामा तत्काल हात्ती दिने सरकारको योजना कार्यान्वयनमा भने नआउने वन तथा वातावरण मन्त्रालयका प्रवक्ता बद्रीराज ढुंगानाले जानकारी दिए ।

कतारले ‘दुर्लभ वन्यजन्तु तथा वनस्पतिको व्यापार महासन्धि’ (साइटिस) प्रावधानअनुसार स्वीकृति लिइनसकेका कारण यसपालि पनि हात्ती उपहार दिने गरी निर्णय कार्यान्वयन नहुने भएको ढुंगानाले जानकारी दिए ।

‘हात्ती छनोट पनि भएको हो, द्विपक्षीय सम्झौताको पनि तयारी थियो, तर कतारका तर्फबाट लिनुपर्ने अप्रुभल (अनुमति) प्राप्त भइनसकेका कारण यसपालि सम्झौता नहुने भएको हो,’ प्रवक्ता ढुंगानाले अनलाइनखबरसँग भने ।

यद्दपि, सम्मानका लागि यो विषय परराष्ट्र मन्त्रालयको प्रेस नोटमा समेटेर पछि अर्को कुनै कार्यक्रम आयोजना गरी द्विपक्षीय सम्झौता र हात्ती हस्तान्तरण हुन सक्ने उनले बताए ।

‘हामीले हात्ती, ती हात्तीलाई पालन–पोषण गरिरहेका माहुतेसहित छनोट गरी हाम्रो तयारी पूरा गरेका थियौं,’ उनले भने, ‘तर, महासन्धिअनुसार कतारको तयारी पूरा हुन सकेन ।’

सरकारले एक पोथी र एक भाले हात्ती उपहारका रूपमा कतार सरकारलाई हस्तान्तरणको योजना बनाएको थियो । रुद्रकली र खगेन्द्र प्रसाद नामका दुई हात्ती कतार सरकारलाई दिने गरी छनोट समेत गरिएको छ ।

प्रवक्ता ढुंगानाका अनुसार हात्तीसँगै नेपालबाट उनीहरूका सुसारेसमेत पठाइने छ । उनीहरूले कतारका कर्मचारीलाई केही समय हात्तीको सुसार कसरी गर्ने भन्नेबारे सिकाउने छन् । त्यसपछि नेपालबाट गएका माहुतेहरू नेपाल आउनेछन् ।

यसअघि नेपालको प्राविधिक टोलीले कतार पुगेर हात्तीको बासस्थान समेत अवलोकन–अध्ययन गरिसकेको छ । कतारलाई दिन लागिएका यी हात्ती ५ वर्ष उमेरहाराहारीका हुन् । दुवै हात्ती चितवन राष्ट्रिय निकुञ्जस्थित हात्ती प्रजनन तथा तालिम केन्द्रमा जन्मिएर हुर्किएका हुन् ।

उता, परराष्ट्र मन्त्रालय स्रोतले भने हात्ती उपहार दिनेबारे सम्झौता हुने जनाएको छ । मन्त्रालयका एक उच्च अधिकारीले नेपालले कतारलाई हात्ती उपहार दिनेबारे सम्झौताको तयारी रहेको बताए ।

यो पनि पढ्नुहोस

कतारी राजा आउँदा त्रिभुवन विमानस्थल आधा घण्टा बन्द

यो पनि पढ्नुहोस

कतारका अमिरलाई स्वागत गर्न राष्ट्रपति पौडेल आफैं विमानस्थल जाने

यो पनि पढ्नुहोस

कतारी राजाको नेपाल भ्रमणमा हुने छैन श्रम सम्झौता पुनरावलोकन

यो पनि पढ्नुहोस

श्रम गन्तव्य मात्रै होइन कतार, बन्न सक्छ लगानीको स्रोत