सुपर ओभरमा ओमानलाई हराउँदै नामिबियाको विजयी सुरुवात

२१ जेठ, अमेरिका । नामिबियाले आईसीसी टी-२० विश्वकप-२०२४ मा ओमानलाई सुपर ओभरमा हराउँदै विजयी सुरुवात गरेको छ ।

समूह बी को पहिलो नाटकीय खेलमा नामिबियाले ओमानलाई हराउँदै अंक तालिकामा दुई महत्वपूर्ण अंक जोडेको छ । अन्तिम ओभरमा नामिबियाले ५ रन बनाउन नसकेपछि खेल सुपर ओभरमा पुगेको थियो ।

सुपर ओभरमा खेल जित्न ओमानले २२ रन बनाउन पर्ने थियो । तर, ओमानले १ विकेट गुमाउँदै १० रन बनायो । नामिबियाका अनुभवी बलर डेविड विजाले आफ्नो अनुभवको भरपूर्ण फाइदा लिदै मात्रै १० रन खर्चिए । त्यसमा पनि अन्तिम बलमा जिशान मकसुदले छक्का हानेका थिए ।

ओमानले सुपर ओभरमा बिलाल खानलाई बलिङ दिएको थियो । मेहरान खानले अन्तिम ओभरमा ४ रन खर्चेर २ विकेट लिएपछि खेल सुपर ओभरमा धकेलिएको थियो । तर, सुपर ओभरमा उनलाई ओमानले बलिङ दिएन । नियमित तीव्र गतिका बलर बिलाल खानलाई बलिङ दिएको थियो ।

सुपर ओभरमा नामिबियाका डेविड विजाले पहिलो बलमा चौका र दोस्रो बलमा छक्का हाने । तेस्रो बलमा दुई र चौथो बलमा एक रन जोडेका थिए । कप्तान जेराल्ड इरास्मसले पाँचौं र अन्तिम बलमा चौका हान्दै २१ रन जोडेका थिए ।

११० रनको लक्ष्य पछ्याएको नामिबियाले २० ओभरमा ६ विकेट गुमाउँदै १०९ रन बनाएको थियो । अन्तिम ओभरमा मध्य गतिका बलर मेहरान खानले मात्रै ४ रन खर्चेर २ विकेट लिएपछि खेल सुपर ओभरमा पुगेको थियो ।

पहिलो बलमा मेहरानले जेन फ्रेलिंकलाई ४५ रनमा बोल्ड गरे । दोस्रो बल डट हुँदा तेस्रो बलमा जेन ग्रीन एलबीडब्लू आउट भए । मलान क्रुगरले चौथो बलमा एक रन लिए । डेविड विजाले पाँचौं बलमा दुई रन बटुलेका थिए । अन्तिम बलमा विजाले मिस गरेका थिए । तर विकेटकिपर नसिम खुसीले रन आउट गर्न चुकेपछि खेल बराबर भएको थियो । नाटकीय रुपमा मेहरानले खेल बराबरी गराएका थिए ।

नामिबियाका जेन फ्रेलिंकले ४८ बलमा ६ चौकासहित सर्वाधिक ४५ रन बनाए । निकोलस डेभिनले २४ र जेराल्ड इरास्मसले १३ रन बनाए । अन्यले राम्रो गर्न सकेनन् ।

ओमानका मेहरान खानले ३ ओभरमा ३ ओभरमा १ मेडनसहित ७ रन खर्चेर ३ विकेट लिए ।

बिलाल खान, आयन खान र अकिब इलियासले १/१ विकेट लिए ।

त्यसअघि केन्सिङ्टन ओभलमा टस हारेर पहिला ब्याटिङको निम्तो पाएको ओमान १९.४ ओभरमा १०९ रनमा अल आउट भएको थियो । ओमानका खालि कैलले ३९ बलमा १ चौका र १ छक्कासहित ३४, जिशान मकसुद २२ र आयन खानले १५ रन बनाए । अन्य कुनैपनि ब्याटरले राम्रो प्रदर्शन गर्न सकेनन् ।

तीव्र गतिका बलर रुबेन ट्रम्पलम्यानले इनिङको सुरुवाती दुई बलमा कश्याप प्रजापति र अकिब इलियासलाई एलबीडब्लू आउट गरेपछि ओमानले कुनैपनि समय राम्रो गर्न सकेन ।

नामिबियाका रुबेन ट्रम्पलम्यानले ४ ओभरमा २१ रन खर्चेर ४ विकेट लिए । डेविड विजाले ३.४ ओभरमा २८ रन खर्चेर ३ विकेट लिए । जेराल्ड इरास्मसले २ र बेनार्ड स्कोल्ट्जले १ विकेट लिए ।