अग्नि सापकोटा विरुद्धको मुद्दामा सर्वोच्चले अर्को महिना फैसला सुनाउने

२३ जेठ, काठमाडौं । पूर्वसभामुख अग्निप्रसाद सापकोटाविरुद्ध दायर रिट निवेदनमा सर्वोच्च अदालतले १२ असारमा निर्णय सुनाउने भएको छ ।

सर्वोच्च अदालतको संवैधानिक इजलासले सापकोटा विरुद्धको रिट निवेदनमाथि अन्तिम सुनुवाइ गर्दै तीन सातापछि निर्णय सुनाउने मिति तोकेको हो ।

आफ्नो पतिको हत्यामा संलग्न सापकोटा विरुद्धको मुद्दा अघि बढाउनुपर्ने माग राखी काभ्रेकी पूर्णिमाया लामाले सर्वोच्च अदालतमा रिट निवेदन दर्ता गरेकी थिइन् ।

उनका पति अर्जुन लामा काभ्रेको श्रीकृष्ण माविबाट १६ वैशाख २०६२ मा अपहरणमा परेका थिए । पछि असारको दोस्रो साता बूढाखानी क्षेत्रमा पुर्‍याएर उनको हत्या भयो । शान्ति प्रक्रिया सुरु भएपछि पूर्णिमाया निवेदन दर्ताका लागि सर्वोच्च अदालतमा पुगिन् ।

प्रहरीले जाहेरी दर्ता गर्न मानेन् । जिल्ला प्रशासन कार्यालयले द्वन्द्वकालीन घटना हेर्न सत्य निरूपण तथा मेलमिलाप आयोग गठन गर्ने संवैधानिक व्यवस्था रहेको भन्दै जाहेरी लिन अस्वीकार गर्‍यो ।

उनले सर्वोच्च अदालतमा मुद्दा हालिन् । सर्वोच्च अदालतले २७ फागुन २०६४ मा निवेदन दर्ता गर्नु भनी आदेश दियो ।

किटानी जाहेरीमा माओवादी नेता अग्नि सापकोटाको समेत नाम थियो । उनको नाममा प्रहरीले पक्राउ पूर्जीसमेत जारी गरेको थियो । त्यसमा सापकोटा सहित सूर्यमान दोङ लगायत ६ जनाको नाम थियो ।

सापकोटा सञ्चार मन्त्रीमा नियुक्त भएपछि उनको नियुक्ति बदर हुनुपर्ने माग राखी सर्वोच्च अदालतमा रिट निवेदन दर्ता भएको थियो । सर्वोच्च अदालतले हरेक १५ दिनमा अनुसन्धानको प्रतिवेदन पेस गर्नु भनी प्रहरीलाई आदेश दिएको थियो ।

१२ साउन २०६९ मा प्रहरीले अनुसन्धानको फाइल तामेलीमा राख्ने भनी निर्णय गर्‍यो । त्यतिबेला डा. बाबुराम भट्टराई नेतृत्वको सरकारले राजनीतिक प्रकृतिको घटना भएको र त्यसबारे सत्य निरूपण तथा मेलमिलाप आयोगले अनुसन्धान गर्ने भन्दै प्रहरीमा रहेको फाइल तामेलीमा राख्ने निर्णय गरेको थियो ।

त्यही निर्णयविरुद्ध परेको रिट निवेदन सर्वोच्च अदालतको संवैधानिक इजलासमा विचाराधीन थियो । संवैधानिक इजलासले तीन सातापछि निर्णय सुनाउने आदेश गरेको हो ।