सप्तरी प्रिमियर लिगको प्लेअफ समीकरण पूरा, तिलाठी कोइलाडी प्लेअफ पुग्ने चौथो टिम

२५ जेठ, सप्तरी । सप्तरीको राजविराजमा जारी राजविराज मेयर कप सप्तरी प्रिमियर लिगको छैठौं संस्करण अन्तर्गत लिग चरणको सबै खेलहरु सकिएसँगै प्ले-अफ समीकरण पनि पुरा भएको छ।

५ खेल पछि ८ अंक सफित छिन्नमस्ता पहिलो, ७ अंकसहित तिरहूत टाइगर्स दोश्रो, समान ७ अंक भएता पनि नेट रन रेट कन्चनरुप राइनोज तेश्रो तथा ६ अंक सहित सनराईज तिलाठी कोइलाडी चौंथो स्थानमा रहेर प्ले-अफ प्रवेश गर्न सफल भयो।

प्रतियोगिताको पहिलो क्वालीफायर शनिवार छिन्नमस्ता लायन्स र तिरहूत टाइगर्स बीच हुनेछ जुन खेलको विजेता फाइनल प्रवेश गर्नेछ। यस्तै शनिवारनै इलिमीनेटरमा कन्चनरुप राइनोज र सनराईज तिलाठी कोइलाडी प्रतिस्पर्धा गर्नेछन्।

इलिमीनेटरको विजेता टिमले पहिलो क्वालीफायरमा पराजित हुने टिमसंग दोश्रो क्वालीफायरमा प्रतिस्पर्धा गर्नेछ जुन खेलको विजेता टिम फाइनल प्रवेश गर्नेछ। दोश्रो क्वालीफायर आइतबार तथा फाइनल खेल सोमबार खेलिनेछ।

पब्लिक विन्देश्वरी मैदानमा सम्पन्न आजको पहिलो खेलमा तिरहूत टाइगर्सले बलान बिहुल सुपर किंग्सलाई ९० रनले पराजित गर्‍यो। तिरहूतले दिएको १८५ रनको लक्ष्य पछ्याएको बलान बिहुलले १४.५ ओभरमा ९४ रनमा सबै विकेट गुमायो।

बलान बिहुलको लागि साहब आलमले सर्वाधिक ३९ रन, पप्पु यादव र सौरभ झाले समान १४ रन योगदान दिए। तिरहूतको बलिङमा अनिल यादव र अभिषेक कार्कीले समान ३ विकेट लिए। अनिलले ३ ओभरमा १० रन तथा अभिषेकले ३ ओभरमा मात्र ५ रन खर्चिए। रुपेश सिंहले २ तथा दिपेश कंडेल र बसिर अहमदले १/१ विकेट लिए।

यस अघि टस जितेर ब्याटिंग गरेको तिरहूत टाइगर्सले निर्धारित १५ ओभरमा ३ विकेट गुमाएर १८४ रन बनायो।

टाइगर्सको लागि बसिर अहमदले आक्रामक अर्धशतकीय पारि खेले। राष्ट्रिय क्रिकेटर समेत रहेका उनले ३२ बलमा ४ चौका र ७ छक्का प्रहार गरे। यस्तै अमित यादवले मात्र १८ बलमा ४८ रन बनाए जुन क्रममा ४ चौका र ५ छक्का प्रहार गरे। रुपेश सिंहले १५ बलमा ५ चौका र १ छक्का मद्दतले अविजित ३० रन तथा शंकर रानाले १७ बलमा ३ चौका मद्दतले १८ रन बनाए । बलिङतर्फ बलान बिहुलका बब्बु गोठीयाले २ तथा शाहब आलमले १ विकेट लिए।

आजको दोश्रो खेलमा राजविराज राजदेवि एघारले सनराईज तिलाठी कोइलाडीलाई ७ विकेटले पराजित गर्‍यो । प्ले-अफ चरण पुग्न जित्ने पर्ने खेलमा राजबिराज राजदेवी एघारले दिएको १९० रनको लक्ष्य तिलाठी कोइलाडीले १६.२ ओभरमा ३ विकेट गुमाएर पुरा गर्यो।

तिलाठी कोइलाडीको लागि बिनोद भण्डारीले सर्वाधिक ६९ रन योगदान दिए। प्लेयर अफ द म्याच समेत घोषित भण्डारीले ४४ बलमा ४ चौका र ६ छक्का प्रहार गरे। यस्तै रोबिन सिंहले ३४, बिशाल सुश्लिंगले २९, नारायण जोशीले अविजित २३ तथा तृत राज दासले १९ रन योगदान दिए। राजविराज राजदेवीको बलिङमा श्रवन यादव र राजनीत कुमारले १/१ विकेट लिए।

यस अघि टस जितेर ब्याटिंग गरेको राजविराज राजदेवी एघारले २० ओभरमा ६ विकेट गुमाएर १८९ रन बनायो।

राजविराजको लागि हिमांशु दत्ता र श्रवन यादवले अर्धशतकीय योगदान दिए। हिमांशुले ४६ बलमा ३ चौका र ५ छक्का तथा श्रवनले ३१ बलमा ३ चौका र ४ छक्का प्रहार गरे। दिलिप नाथले ३२ तथा मुकेश यादवले १५ रन बनाए।

बलिङतर्फ सनराईज तिलाठी कोइलाडीका बिशाल सुश्लिंगले सर्वाधिक ३ विकेट लिए जुन क्रममा ४ ओभरमा २४ रन खर्चिए। नारायण जोशीले २ तथा धिरिज कुमार मण्डलले १ विकेट लिए।

जेठ २८ गते सम्म आयोजना हुने प्रतियोगितामा ६ टिम सहभागी छन्। कन्चनरुप राइनोज, छिन्नमस्ता लायन्स, बलान बिहुल सुपर किंग्स, राजविराज राजदेवी एघार, तिरहुत टाइगर्स र सनराइज एघार तिलाठी कोइलाडी लिगमा सहभागी छन् ।