तत्कालीन सेञ्चुरी बैंकका अध्यक्ष श्रेष्ठसहित ८ जना २ दिन हिरासतमा रहने

२८ जेठ, काठमाडौं । तत्कालिन सेन्चुरी बैंकले कमसल धितोमा ऋण दिएको प्रकरणमा अनुसन्धानका लागि पक्राउ परेका अध्यक्ष राजेश श्रेष्ठ र सञ्चालक समितिका सदस्यहरु दुई दिन हिरासतमा रहने भएका छन् ।

सोमबार पक्राउ परेका उनीहरुलाई मंगलबार प्रहरीको केन्द्रीय अनुसन्धान ब्यूरो सीआईबीले जिल्ला अदालत काठमाडौंमा पेश गरेको थियो । अदालतले उनीहरुमाथि अनुसन्धानका लागि दुई दिनको समय दिएको सीआईबीका प्रवक्ता होविन्द्र बोगटीले जानकारी दिए ।

सेञ्चुरी बैंकले कमसल धितोमा दुई अर्ब ११ करोड ६५ लाख ५५ हजार रुपैयाँ बराबरको कर्जा प्रवाह गरेको सीआईबीले बताएको छ । उक्त ऋण धितोभन्दा ९७ करोड ४१ लाख ७० हजार ७ सय ७२ रुपैयाँले बढी पाइएको सीआईबीको दाबी थियो । यही विषयमा अनुसन्धानका लागि सीआईबीले सोमबार अध्यक्ष श्रेष्ठसँगै सञ्चालकहरु सुनिलकुमार न्याैपाने, प्राडा गीता प्रधान, रमेश कुमार निराैला, रणबहादुर श्रेष्ठ, राजेश कुमार दली, उमाकुमारी श्रेष्ठ र शिवगाेपाल रिसाललाई पक्राउ गरेको थियो ।

यसअघि कमसल धितोमा बढी कर्जा प्रवाह गरेको आरोपमा १५ फागुन २०८० मा तत्कालीन सेञ्चुरी बैंकका प्रमुख कार्यकारी अधिकृत (सीईओ) मनोज न्यौपाने र तुलसी गौतमसहितका कर्मचारी पक्राउ परेका थिए ।उनीहरु १ चैतमा हाजिर जमानीमा छुटेका थिए । हाल सेञ्चुरी बैंक प्रभु बैंकमा गाभिइसकेको छ ।