२०८१ साउन ४ गते ८:५७ 
४ साउन, माले । काभा यू-२० महिला भलिबल च्याम्पियनसिपमा नेपालले आज आफ्नो दोस्रो खेलमा किर्गिस्तानसँग खेल्दैछ ।
नेपाल र कीर्गिस्तानबीचको खेल नेपाली समय अनुसार राति ९:१५ बजे मालेस्थित सोसियल सेन्टर कभर्डहलमा हुनेछ ।
पहिलो खेलमा श्रीलंकासँग पराजित भएको नेपाली टोली पहिलो जितको खोजीमा छ । श्रीलंकासँग नेपाल ३-१ को सेटमा पराजित भएको थियो ।
उता किर्गिस्तानले भने पहिलो खेलमा घरेलु टोली माल्दिभ्सलाई सोझो सेटमा पराजित गरेको थियो । नेपालले पहिलो खेलमा रिसिभ र डिफेन्समा राम्रो प्रदर्शन गर्न नस्कदा हार व्यहोरेको थियो ।
पहिलो खेलमा गरेको गल्तीलाई नदोहोर्याई कीर्गिस्तान विरुद्ध राम्रो प्रदर्शन गर्ने नेपालका मुख्य प्रशिक्षक कुमा राईले बताए । पहिलो खेलमा स्पाईकर सलिना बुढामगर र मिना सुनारबाहेक अन्य खेलाडीको प्रदर्शन राम्रो हुन सकेन ।
पहिलो खेल भएकोले पनि खेलाडीको तालमेल र यहाँको वातावरणमा खेल्न नेपाली खेलाडीलाई केही कठिन भएको थियो । चार टोली सहभागी प्रतियोगितामा नेपालले लिगको अन्तिम खेल शनिवार माल्दिभ्ससँग खेल्नेछ । लिगमा जस्तो नतिजा आएपनि चारै टोलीले सेमिफाइनल खेल्नेछन् ।
सेमिफाइनलमा लिगमा पहिलो हुनेले चौथोसँग र दोस्रो हुनेले तेस्रोसँग खेल्नेछ । सेमिफाइनल विजेताबीच फाइनल खेल हुनेछ ।
नेपाली टोली : सलिना बुढा मगर, जेनिशा विश्वकर्मा(कप्तान), एलिसा मानन्धर, निशा महर, भावना तामाङ, एन्जिला प्रधान, निशा चौधरी, आरती चौधरी, मिना सुनार, अनुषा चौधरी, स्नेहा ठगुन्ना, आशिका क्षेत्री
प्रतिक्रिया 4