अन्तर्राष्ट्रिय उडान छुटेका यात्रुलाई विविध शुल्कमा छुट दिन प्राधिकरणको आग्रह

१३ असोज, काठमाडौं । नेपाल नागरिक उड्डयन प्राधिकरणले प्रतिकूल मौसमका कारण आन्तरिक उडान नहुँदा अन्तर्राष्ट्रिय उडान छुटेका यात्रुलाई विविध शुल्कमा छुट दिन विदेशी वायु सेवा कम्पनीहरूलाई आग्रह गरेको छ ।

प्राधिकरणका अनुसार त्रिभुवन अन्तर्राष्ट्रिय विमानस्थलबाट २७ सेप्टेम्बरदेखि २ अक्टोबरसम्मका उडानमा मिति परिवर्तन गर्दा, नो शो र भाडा यथावत राख्न अन्तर्राष्ट्रिय वायु सेवा कम्पनीहरूलाई अनुरोध गरिएको हो ।

यसरी दिइने छुट टिकटबाट ११ अक्टोबरसम्म लागु हुने गरी व्यवस्था मिलाउन प्राधिकरणले अनुरोध गरेको हो ।

यसअघि संस्कृति, पर्यटन तथा नागरिक उड्डयन मन्त्रालयले प्राधिकरणलाई आन्तरिक उडान नहुँदा अन्तर्राष्ट्रिय उडान छुटेका यात्रुले टिकटको मिति सार्दा शुल्क नलाग्ने व्यवस्था मिलाउन निर्देशन दिएको थियो ।