२०८१ असोज १५ गते १८:४० 
१५ असोज, काठमाडौं । एभरेष्ट वुमन्स भलिबल लिग (इडब्ल्युभीए) को दोस्रो दिन गण्डकी थन्डर्सलाई हराउँदै कर्णालीले लगातार दोस्रो जित निकालेको छ ।
राष्ट्रिय खेलकुद परिषदको कर्भड हलमा भएको खेलमा कर्णालीले गण्डकीलाई ३-२ ले हराएको हो । कर्णालीले गण्डकीलाई १५-२५, २५-२२, २५-१७,१९-२५ र १५-१२ ले हराएको हो ।
पहिलो सेटमा८-४ को सुरुवाती अग्रता बनाएको कर्णालीले अग्रता जोगाउन नसक्दा पहिलो सेटमा १४ बराबरीको अवस्था आयो । त्यसपछि भने गण्डकीले लगातार अंक ल्याउँदै २२-१५ को अवस्था हुँदै २५-१५ मा सेट जित्यो । गण्डकीले लगातार ११ अंक जोड्दै पहिलो सेट जितेको हो ।
दोस्रो सेटमा भने कर्णालीले २५-२२ ले बाजी मार्यो । । तेस्रो सेटमा पनि कर्णालीले लय कायम राख्दै २५-१७ले गण्डकीलाई जित्यो ।
चौथो सेट गणडकीले २५-१९ ले जित्दा खेल पाँचौं सेटमा लम्बिएको हो। पाँचौं सेटमा भने कर्णालीले अग्रता बनाउँदै ८-५ को अग्रता बनाउँदै १५-१२ ले सेट जित्दै लगातार दोस्रो जित हात पारेको हो । पहिलो खेलमा कर्णालीले मधेशलाई हराएको थियो ।
आजको खेल हारेपनि गण्डकीले १ अंक पायो । गण्डकीले पहिलो खेलमा चितवन शक्तिसँग हार बेहोरेको थियो। आजको दोस्रो खेल चितवन शक्ति र काठमाडौं स्पाईकर्सबिच हुनेछ ।त्यस्तै, आजको तेस्रो खेल ललितपुर र मधेशबीचको खेल हुनेछ ।
प्रतिक्रिया 4