बार्बिक्यु गरेको मासुले क्यान्सर हुन्छ ?

दशैंमा छाकैपिच्छे तारेको, साँधेको, मसालेदार, ग्रेभी माछामासुका परिकारहरु घरघरमा पाक्छ । अहिले त मसालेदार खानेकुरासँगै सपरिवार बसेर मदिरापान गर्ने ट्रेन्ड जत्तिकै भइसक्यो ।

चाडबाड आयो भन्दैमा ज्यान नै जोखिममा पार्ने गरी शरीरले सहनै नसक्ने गरी मदिरा तथा चिल्लो र मसालेदार खानेकुरा अत्यधिक खाँदा आकस्मिक स्वास्थ्य समस्या लिएर अस्पताल जानुपर्ने हुन्छ ।

आजभोलि त मासुका परिकारलाई बार्बिक्यु गरेर पनि खाइन्छ । यसरी खाँदा जिब्रोले स्वाद त मीठो पाउँछ । तर स्वास्थ्यका लागि त्यति फाइदाजनक मानिंदैन । त्यति मात्र होइन, जो घरमा पहिलेदेखि नै  क्यान्सर वा अन्य बिरामी छन्, उनीहरुका लागि कस्तो खानेकुरा खाने ? कति मात्रामा खाने ? मसालेदार खानेकुराले कस्तो असर गर्ला ? भन्ने हेक्का राख्नुपर्छ ।

बिरामीले मात्र होइन, लगातार तारेको, भुटेको, चिल्लो र अत्यधिक मसालेदार खानेकुरा अत्यधिक खानु स्वस्थ व्यक्तिकै लागि पनि हानिकारक हुन्छ ।

किन यस्ता खानेकुरा हानिकारक हुन्छ ?

धेरै अध्ययनले आगोमा सोझै पोलेको, डढाएको बार्बिक्यु गरेको राँगा, खसी, बंगुर, माछा, कुखुराको मासुको बढी सेवनले क्यान्सर समेत गराउन सक्ने प्रमाण भेटिएका छन् ।

आगोमा पोल्दा क्यान्सर गराउने तत्वहरु उत्पन्न हुन्छन् । जस्तो कि हेटेरोसाइक्लिक एरोमाटिक एमाइन (एचएए) र पोलिसाइक्लिक एरोमेटिक हाइड्रोकार्बन (पीएएच) ।

यी दुवै तत्वले मानिसको अनुवांशिक इकाई डीएनएमा भएको परिवर्तनले विभिन्न अंग फोक्सो, पेट, छाला, पिसाबथैलीमा क्यान्सर गराउने विज्ञहरु दाबी समेत गर्छन्  ।

उच्च तापक्रमको आगोमा मासु पोल्दा हेटेरोसाइक्लिक एरोमेटिक कम्पाउन्ड र बेनजीनमा पनि क्यान्सर उत्पन्न गर्ने तत्व हो । एचएए कम्पाउण्डको उपभोगले आन्द्रा तथा मलद्वारको क्यान्सर गराउन सक्छ । तसर्थ, मासु र तरकारी पनि पोलेर खाने गरेमा, डढेको खानोकुरा खाएमा शरीरमा हानि पुग्छ ।

मासु मात्र होइन, धेरै तातो खाना, तरलपदार्थ, तातो चिया पिउनु पनि हानिकारक छ ।

यी तत्वको वृद्धिलाई कम गर्न मासुलाई सफा सुकिलो भाँडामा राखेर मन्द आँचमा पकाउनुपर्छ । यसरी पकाउँदा पनि मासु वा तरकारीलाई डढ्न दिन हुँदैन । यसरी पकाइएको खाना सुरक्षित हुन्छ ।

रातो मासु हानिकारक

मासुमा पनि रातो मासु शरीरका लागि हानिकारक मानिन्छ । एक, दुई टुक्रा रातो मासु खाएर केही फरक पर्दैन । तर धेरै मात्रामा दैनिक रातो मासु खाने गर्दा पेट, आन्द्रा र मलद्वारको क्यान्सरलाई बल्झाउँछ ।

त्यस्तै, प्रशोधित मासु बढी खाँदा पनि स्वास्थ्यलाई असर गर्न सक्छ । ती मासुभित्र कीटाणु नष्ट पार्ने कीटाणुहरु हुन्छन् । ती कीटाणु मार्ने रसायन हालिएको हुन्छ । जुन स्वास्थ्यका लागि हानिकारक मानिन्छ ।

मिठाइमा पनि हुनसक्छ हानिकारक रसायन

चाडबाडमा सबैभन्दा बढी मिठाइका परिकारको व्यापार हुन्छ । किनकि यो बेलामा मिठाई बाँडेर एकअर्कोमा मिठास बाँड्ने चलन छ ।

लड्डु, बर्फी, लालमोन, रबडी जस्ता आकर्षक देखिने मिठाईहरुमा एक त अखाद्य रंग (चाँदीको पन्ना र अन्य रंगहरु) हालिएको हुन्छ ।

अर्को भनेको उच्च मात्रामा तेल र चिनीको मात्रा हालिएको हुन्छ । यी दुवैले स्वास्थ्यलाई स्वादसँगै मन्द विष दिइरहेको हुन्छ । अखाद्य रंगमा पनि क्यान्सर गराउने तत्व हुन्छ ।

सफ्ट ड्रिंक

ताजा जुस वा फलफूल स्वास्थ्यका लागि फाइदाजनक छन् । यी खानेकुरामा शरीरको विकास, कार्य र ऊर्जा दिने आवश्यक भिटामिन, खनिज, फाइबर, एन्टी अक्सिडेन्ट तत्व हुन्छ ।

तर फ्लेभर राखिएका पेय, कोक, फेन्टा जस्ता पेयहरु पनि चाडबाडमा निकै खपत हुन्छ । यस्ता पेयमा पनि हानिकारक रसायन हुन्छ । जुन स्वास्थ्यका लागि कदापि राम्रो होइन ।

घरमा अस्वस्थ सदस्यलाई कस्तो खानपान ?

क्यान्सर र अन्य दीर्घकालीन रोगमा प्रोटिनयुक्त, बोसोरहित मासु, गेडागुडी, भिटामिनयुक्त र खनिज भएको खाना खानुपर्छ ।

कति मात्रामा खाने भन्ने कुरा रोग अनुसार सम्बन्धित चिकित्सकको सल्लाहमा खानुपर्छ ।

यो पनि पढ्नुहोस

दशैंमा मासु खाँदा के कुरामा ख्याल गर्ने ?

यो पनि पढ्नुहोस

मासु किन ढिलो पच्छ ?

यो पनि पढ्नुहोस

रक्सी र स्न्याक्स एकसाथ खाँदा के हुन्छ ?