२०८१ पुष १ गते ७:१९ 
१ पुस, काठमाडौं । इंग्लिस प्रिमियर लिग फुटबलमा म्यान्चेस्टर युनाइटेडले रोमाञ्चक पुनरागमन जित निकालेको छ । गएराति भएको म्यान्चेस्टर डर्बी अर्थात् म्यान्चेस्टर सिटीसँगको खेलमा युनाइटेडले २-१ को जित निकालेको हो ।
खेलभर लिएको अग्रतालाई अन्तिमसम्म जोगाउन नसक्दा सिटी घरेलु मैदानमै स्तब्ध भएको हो । युनाइटेडका लागि ब्रुनो फर्नान्डेस र अमाड दियालोले १-१ गोल गरे । सिटीका जोस्को भार्डिओलले १ गोल गरे ।
खेलको ३६औं मिनेटमा भार्डिओलले गोल गर्दै सिटीलाई अग्रता दिलाएका थिए । पहिलो हाफ १-० मा सकिएको थियो ।
दोस्रो हाफमा पनि दुवै टोलीबाट गोल निस्किरहेको थिएन तर ८८औं मिनेटमा युनाइटेडले पेनाल्टी पायो जसमा ब्रुनोले गोल गर्दै खेल बराबरीमा ल्याए ।
त्यसपछि ९०औं मिनेटमा अमाडले गोल गर्दै युनाइटेडलाई रोमाञ्चक पुनरागमन जित दिलाए ।
यो जितसँगै युनाइटेडको १६ खेलमा २२ अंक भएको छ र १३औं स्थानमा छ । १६ खेलमा २७ अंक भएको सिटी पाँचौं स्थानमा झरेको छ ।
प्रतिक्रिया 4