एचपीभी खोप के हो ?
पाठेघरको मुखको क्यान्सरविरुद्घ लगाइने खोपलाई हृयुमन प्यापुलोना भाइरस अर्थात् (एचपीभी) खोप भनिन्छ ।
किन लगाउने ?
- पाठेघरको मुख क्यान्सर लगायत एचपीभी भाइरसका कारण लाग्ने अन्य रोगबाट बच्न
- महिलामा सबैभन्दा बढी सताउने पाठेघरको मुखको क्यान्सर लाग्न नदिन
कसले लगाउने ?
- जति कम उमेरमा लगायो, त्यति राम्रो
- ९ देखि १४ वर्ष उमेर समूहमा सबैभन्दा प्रभावकारी
- महिलाले पनि चिकित्सकको सल्लाहअनुसार लगाउन सक्ने
कहाँ पाइन्छ ?
यो खोप निजी अस्पतालमा लगाउन सकिन्छ । हाल सरकारले सो खोप कार्यक्रम अभियानमार्फत निःशुल्क उपलब्ध गराउँदैछ ।
निःशुल्क खोप कसका लागि ?
कक्षा ६ देखि १० सम्मका छात्रा, विद्यालय नजाने भए १० देखि १४ वर्ष उमेर समूहका किशोरी
खोप अभियान कहिलेबाट ? कति मात्रा लगाउनुपर्छ ?
- माघ २३ गतेदेखि फागुन ६ गतेसम्म गरी १५ दिन चल्ने ।
- यो खोप एकपटक लगाए पुग्छ ।
कुन कम्पनीको खोप दिइँदैछ ?
नेपालमा हाल चीनमा बनेको सिकोलिन ब्राण्डको खोप उपलब्ध दिइने तयारी गरिएको छ ।
यो खोप कति प्रभावकारी ?
यो खोप ९१ प्रतिशत प्रभावकारी हुने दाबी गरिएको छ । यौन जीवनमा सक्रिय हुनुपूर्व लगाउन सके शतप्रतिशत सुरक्षित राख्छ ।
खोप कहाँ लगाउन पाइन्छ ?
सातवटै प्रदेशमा रहेका सरकारी तथा निजी विद्यालय र नजिकैको स्वास्थ्य संस्थामा लगाउन पाइन्छ ।
व्यक्तिगत रुपमा लगाउन पाइन्छ ?
यो खोप अभियानको दायरामा नपर्ने महिलाले निजी अस्पतालमा गएर लगाउन पाउँछन् ।
कति खर्च लाग्छ ?
नेपालमा एचपीभी खोपको मूल्य निजी क्षेत्रमा तीन हजारदेखि १० हजार रुपैयाँसम्म पर्न सक्छ ।
यो खोप नलगाउँदा के हुन्छ ?
यदि खोप लगाइएन भने एचपीभी भाइरसको संक्रमण भई पाठेघरको मुखको क्यान्सरको जोखिम हुनसक्छ । हरेक वर्ष नेपालमा पाठेघर मुखको क्यान्सरबाट वार्षिक दुई हजारको मृत्यु हुने गरेको छ ।
