वरिपरी थारु सभासद राखेर देउवाले भने- म कसरी थारु विरोधी भएँ ?

८ भदौ, काठमाडौं । अखण्ड सुदूपश्चिमको अडान लिँदै आएका नेपाली कांग्रेसका वरिष्ठ नेता शेरबहादुर देउवाले आफू थारु विरोधी नभएको दाबी गरेका छन् ।

थारु समुदायको आन्दोलनका क्रममा सोमबार कैलालीको टीकापुरमा भएको हिंसात्मक झडपमा नेपाल प्रहरीका एसएसपी लक्ष्मण न्यौपानेसहित सात सुरक्षकर्मी मारिएको भोलिपल्ट देउवाले आफ्नै निवास बुढानिलकण्ठमा पत्रकार सम्मेलन आयोजना गरेका थिए ।

आफ्नो दायाँ बायाँ दुबै तिर पार्टीका थारु नेता तथा सभासदलाई राखेर पत्रकारमाझ प्रस्तुत भएका देउवाले आफू थारु विरोधी नभएको दाबी थुप्रै दलिल पेश गरे । उनले भने-‘जो मान्छेले कमैयालाई जग्गा दिएको छ, कसरी थारु विरोधी हुन्छ ? यद्यपि म पहाडी हुँ । कमैयाका पक्षमा भाषण गरेको छु । त्यस्तो व्यक्ति थारुविरोधी हुन्छ ?’

थरुहट प्रदेश बनाउनु पर्ने थारु समुदायको मागलाई भने उनले अस्वीकार गरेका छन् । ‘थारुलाई दियो भने अरुलाई पनि दिनुपर्छ’ भन्दै उनले थारुहरुलाई अरु अधिकार दिइने बताए ।

विगतदेखि थारु र पहाडी मिलेर बसेको भन्दै उनले यो एकता कायम राख्नुपर्नेमा जोड दिए ।

साथै उनले आफूलाई थारुलाई रौं पनि दिन्न नभनेको दाबी गरे । तर, जिल्ला टुक्राउन नहुने पक्षमा हिजो पनि रहेको, आज पनि रहेको र भोलि पनि रहने बताए ।

भिडियो

देउवासँगै एमालेका भीम रावल, एमाओवादीका लेखराज भटट्सहितका नेताहरुले अखण्ड सुदूरपश्चिमको अडान लिँदै आएका छन् । प्रदेशको सीमांकनबारे भएको पछिल्लो छलफलमा थारु सभासदले कैलालीको थारु बाहुल्य क्षेत्रलाई बर्दियासहितकेा प्रदेशमा राखे सहमति हुन सक्ने बताए पनि देउवासहितका नेताहरुले अस्वीकर गर्दै आएका छन् ।

कांग्रेस वरिष्ठ नेता देउवाले एसएसपीसहित ८ जनाको मृत्यु हुने गरी कैलालीको टीकापुरमा सोमबारको हिसांत्मक झडपलाई अपराधिक घटनाको संज्ञा दिएका छन् । यो जघन्य अपराध भएको भन्दै उनले यस्तो गर्ने जोसुकै कडा भन्दा कडा कारवाही गर्नुपर्ने बताए ।

उनले सम्वाद समितिका सभापति डा. बाबुराम भट्टराईले राजनीतिक कुरा गरेको भन्दै आपत्ति समेत जनाए । सम्वाद समितिको सभापति भएपछि राजनीतिक कुरा गर्न नपाइने भन्दै उनले भट्टराईले झगडा गराउने काम गरेको आरोप पनि लगाएका छन् ।