महमा औषधिय गुण हुन्छ, जसले धेरै रोग निको पार्छ । तर, त्यही मह विषाक्त बन्यो भने एकैछिनमा थला पार्छ ।
मह आफैमा विषाक्त हुँदैन । त्यसमा अरु तत्व परेमा विषाक्त बन्न सक्छ । उच्च पहाडमा हुने लालीगुराँसका फूलमा ग्रायनोटक्सिन भन्ने रसायन हुन्छ । माहुरीले यस्ता फूलबाट रस लिएर मह बनाउँदा त्यो रसायन महमा मिसिन्छ । यस्तो मह बढी खाएमा स्वास्थ्यलाई असर गर्न सक्छ ।
त्यस्ता मह खाएमा मुटुको धड्कन कम हुने, आँखाको नानी फुलाउने, कुनै पनि दृश्यलाई दुईवटा देख्ने, वाक–वाक लाग्ने, रिंगटा लाग्ने, बान्ता आउने र कुनैकुनै केसमा बिरामी बेहोस बनाउने गर्छ ।
विशेष गरेर एक पटक कात्तिक-मंसिर र अर्को पटक चैत-वैशाखतिर भीर माहुरीको मह काड्छ । त्यो समयको फूलबाट लिएको रस विषाक्त हुने र कोही–कोही त एक चम्चा खाँदा पनि बेहोस् हुनसक्ने विज्ञहरु बताउछन् ।
मह तताउनु हुँदैन
मह आफैँमा गर्मी गराउने तत्व भएकाले तताएर खाँदा झन् बढी गर्मी गराउने मात्र नभई कुनै विषालु फूलको रस मिसाइएको छ भने तताउँदा विषालुपन बढ्ने र त्यो सेवन गर्दा शरीरलाई हानि गर्न सक्छ ।
