पर्सामा एकैदिन ७ जनामा कोरोना संक्रमण पुष्टि

१७ जेठ, वीरगञ्ज । पर्सामा शनिबार एकैदिन सात जनामा करोना संक्रमण पुष्टि भएको छ ।शनिबार बिहान र साँझ गरी पर्सामा सात जनामा काेराेना संक्रमण पुष्टि भएकाे हाे ।

शनिबार साँझ पर्साको पटेर्वा सुगौली गाउँपालिकाको निचुटास्थित क्वारेन्टाइनमा बस्दै आएका ५ जनामा संक्रमण पुष्टि भएको हो । जसमध्ये १ जना महिला र ४ पुरुष छन् ।

नारायणी अस्पतालका प्रयोगशाला प्रमुख डा. निरा पाठकका अनुसार साँझ संक्रमित पुष्टि भएकामा एक जना २५ बर्षिया महिला छन् । यस्तै संक्रमित हुनेमा २२ वर्षका दुई जना, २५ वर्ष र ३६ वर्षका एक एक जना पुरूष छन् ।

वीरगञ्जस्थित नारायणी अस्पतालको प्रयोगशालामा गरिएको पीसीआर परीक्षणमा उनीहरुको रिपोर्ट पोजेटिभ आएको उनले बताइन् ।

यसअघि शनिबार बिहान सखुवाप्रसौनी क्वारेन्टिनमा बसेका १८ वर्षीय युवक र ६० वर्षीया महिलामा कोरोना संक्रमण पुष्टि भएको थियो ।

ल्याब बन्द हुने अवस्था आयाे

कन्सल्टेन्ट प्याथोलोजिष्ट डा. पाठकले नारायणीको पीसीआर परीक्षण ल्याब बन्द हुने अवस्था आएकाे जानकारी दिइन् । परीक्षणको लागि आवश्यक सामग्री नहुँदा ल्याब पुनः बन्द गर्नुपर्ने अवस्था आएको उनले बताइन् ।

तीन दिन अगाडिदेखि आवश्यक सामग्री माग गरिए पनि उपलब्ध हुन नसकेपछि ल्याब बन्द गर्नुपर्ने अवस्था आएको उनको भनाइ छ । ‘आज एक सिफ्ट चल्यो, अब ल्याब बन्द गर्नुपर्ने भएको छ,’ उनले भनिन्, ‘फिल्टर टिप्स लगायत आवश्यक सहयोगी सामानहरु सक्किएको छ । ती समान नआउँदासम्म सञ्चालन गर्न सकिँदैन ।’

भोलिसम्म समान आउन सक्ने उनको अनुमान छ । एक सिफ्टमा ३६ वटा नमुना परीक्षण गर्न सक्ने क्षमताको ल्याब वीरगञ्जमा सञ्चालनमा ल्याइएको थियो ।