लाइभ बैठकका निर्णय लेख्न कांग्रेसमा गलफती, पदाधिकारी अनिर्णित

९ साउन, काठमाडौं । सानेपा मूख्यालयमा ६ दिनसम्म बसेको कांग्रेस केन्द्रीय कार्यसमिति बैठकका निर्णय लेख्न सभापति शेरबहादुर देउवाले पदाधिकारीहरुलाई मंगलबार साँझ धुम्बाराही निवास डाके ।

सुरुमा देउवाले संक्षिप्त बोले, ‘ल साथीहरु बैठक सुरु भयो । सबैले आफ्ना कुरा पालैपालो राखौं ।’ महामन्त्री विश्वप्रकाश शर्माले पाइन्टको देब्रे खल्तीबाट मोबाइल फोन झिकेर देउवातिर तेर्स्याउँदै जिस्क्याए, ‘आज पनि लाइभ गर्ने कि सभापतिज्यू ?’

सबै पदाधिकारीहरु हाँसे । हँस्यौलीमा देउवा पनि मिसिए । उनले शर्मातिर हेर्दै जवाफ दिए, ‘यो त कहाँ लाइभ हुन्छ यार ? अनौपचारिक पो त ।’

देउवाको तर्फबाट बोल्दै कार्यवाहक प्रधानमन्त्री तथा उपसभापति पूर्णबहादुर खड्काले बैठकका छलफललाई ‘फाइन–ट्युन’ गर्ने, आवश्यक ठाउँमा परिमार्जन गर्ने कामको तयारी गर्नुपर्ने बताए । ‘सबै छलफललाई जस्ताको तस्तै लेख्न सम्भव नभए पनि मूख्य कुराहरु नछुटुन्, सबैको भावना आओस्, त्यसरी निर्णयहरु लेख्नुपर्छ साथीहरु,’ उनले भने ।

दुई महामन्त्री गगन थापा र विश्वप्रकाश शर्माले बालकृष्ण खाँणको निलम्बन मुद्दालाई पार्टीले अनिवार्य निर्णय गराइछाड्नुपर्ने, अनि मात्रै कांग्रेसले विधिको शासनमाथि राख्दै आएको प्रतिबद्धताको परिपालना हुने अडान लिए ।

थापाले सभापतिलाई आग्रह गर्दै भने, ‘मान्छेहरुले हामीलाई यो निर्णयका आधारमा मूल्यांकन गर्नेछन्, त्यसैले को व्यक्ति भन्ने मुख्य होइन, हामीले के गर्‍यौं भन्ने मुख्य हो । निर्णय लेख्न खुट्टा नकमाऔं ।’

देउवा पक्षका केही पदाधिकारीले भने अहिले खाँण निलम्बनबारे निर्णय लेख्न हतार नगरे पनि हुने तर्क गरेका थिए । सहमहामन्त्री महेन्द्र यादवले केन्द्रीय कार्यसमितिकै तर्क दोहोर्‍याउँदै खाँण लगायत कांग्रेसका प्रभावशालीविरुद्ध नियोजित रुपमा राज्यका केही मान्छे लागेको भन्दै नेतृत्वले समयमै बुझ्नुपर्ने उल्लेख गरे । एक नेताले अनलाइनखबरसँग भने, ‘आज खाँणकै विषयमा निकैबेर गलफत्ती भयो, तीन घण्टाको बैठकमा निकै समय यही विषयले खायो ।’

त्यसपछि बैठक भोलि ११ बजे फेरि बस्ने गरी विना निष्कर्ष टुंगिएको छ । भोलिको बैठकस्थल भने किटान गरिएको छैन । बैठकका समग्र निर्णयको मस्यौदा गर्ने जिम्मा महामन्त्री शर्मालाई दिइएको एक सहभागीले बताए । शर्माले भने आफूले मात्रै निर्णयको मस्यौदा नगर्ने दाबी गरे ।

यद्यपि खाँण निलम्बनबारे कुनै निर्णय नगरी बैठक सकिने सम्भावना बढ्ता रहेको केही पदाधिकारीले संकेत गरे ।

बुधबार बस्ने पदाधिकारी बैठकले नीति महाधिवेशनको मिति तोक्ने भएको छ । महामन्त्री शर्माले अनलाइनखबरलाई दिएको जानकारी अनुसार भोलि बुधबार पदाधिकारी बैठक सुरु हुनुअघि सभापति देउवा र दुई महामन्त्री छुट्टै छलफलमा जुट्नेछन् । त्यही छलफलले नीति महाधिवेशनको मितिलाई अन्तिम टुंगो दिने छ ।

आजको बैठकमा सबै पदाधिकारीका अतिरिक्त प्रवक्ता प्रकाशशरण महत, प्रचार विभाग प्रमुख मीन विश्वकर्मा र संसदीय दलका प्रमुख सचेतक रमेश लेखक पनि उपस्थित थिए ।

१० दिनपछि संसदीय दल बैठक बस्ने, त्यसलाई समेत लाइभ गर्ने तयारी भइरहेको एक पदाधिकारीले जानकारी दिए । ‘रणनीतिक छलफल हुने केन्द्रीय कार्यसमिति बैठक त लाइभ गराएर सन्देश दियौं, संसदीय दलमा लुकाउनुपर्ने के हुन्छ र ?’ उनले भने, ‘केही गोप्य तयारीका विषय भए छुट्टै कुरा । नत्र यस्ता बैठक लाइभ नै गर्ने हो ।’

बागी र अन्तर्घातीलाई के गर्ने ?

पोहोर मंसिरको आम चुनावमा अन्तर्घात गर्ने, बागी उठ्ने आधिकारिक उम्मेदवार हराउन लाग्नेलाई के कसरी उन्मुक्ति दिने भन्ने निर्णय लेख्नमा आजको बैठकमा लामै मतान्तर भएको छ ।

जारी केन्द्रीय समिति बैठकमा अनुशासन समिति संयोजक आनन्दप्रसाद ढुंगानाले अनुशासन उल्लंघनकर्ताको सूची पेश गर्दै तिनलाई कसरी फेरि पार्टी काममा फर्काउने भन्नेबारेमा प्रस्ताव राखेका थिए ।

बागी, अन्तर्घाती र अनुशासन उल्लंघनकर्ताको पहिचान गर्नेमा नै पदाधिकारी बाँडिएका छन् । देउवा निकट पदाधिकारीले उनीहरुलाई विधान कुल्चेर अनुशासन तोडे पनि सहजै कारबाही फुकुवा गरिएको सन्देश जान नहुने अडान लिएका छन् । उनीहरुले गरेको गल्तीको पहिचान हुनेगरी नै निर्णयमा लेखिनुपर्ने तर्क गरेका छन् । तत्कालीन कांग्रेस, माओवादी लगायतको गठबन्धनको विपक्षमा उभिनेहरुलाई अनुशासन तोडेको स्वीकारोक्ति गराउनुपर्ने उनीहरुको मत छ ।

देउवा इतर समूहका पदाधिकारीले भने फरक तर्क पेश गरेका छन् । कारबाही सिफारिस भएकाहरुले हामी रुखबाहेक अरु चिह्नमा भोट हाल्दैनौं भन्नु पार्टी अनुशासनको उल्लंघन नभएको उनीहरुको भनाइ छ ।

‘म पार्टीका पक्षमा छु, त्यसैले पार्टीको निर्णय मान्दिनँ भनेका हुन्, खासमा ती पार्टीका असाध्यै प्रतिबद्ध साथीहरु हुन्’, देउवा इतर पक्षका पदाधिकारीले धुम्बाराही बैठकमा राखे, ‘उनीहरुलाई सहज भावमा पार्टीमा स्वागत गर्नुपर्छ । प्रतिकुल भावना आउन नदिई काममा जिम्मेवारी दिनुपर्छ ।’

यो गलफत्ती बढ्दै जाँदा बैठक निष्कर्षमा पुग्न सकेन ।

बुधबारको बैठकले सरकारलाई पछिल्ला राष्ट्रिय सरोकारबारे गम्भीर ध्यानाकर्षण गराउने तयारी गरेको छ । शिक्षा ऐन, निजामती कर्मचारी ऐन, लम्पी स्किनका पीडित, भ्रष्टाचार र सुशासन लगायत विषयमा कांग्रेसले गम्भीर दिशानिर्देश गर्ने पदाधिकारीहरुले अनलाइनखबरलाई बताए ।

पदाधिकारी बैठक सकिएपछि भोलि अपराह्न चार बजे सानेपामा केन्द्रीय कार्यसमिति बैठक बस्नेछ । अन्तिम दिनमा निर्णय पारित गर्ने र सभापति देउवाले बोल्ने कार्यक्रम छ ।