बैंकको सञ्चालक हुन ७० वर्षे उमेर हद राख्ने प्रस्ताव

८ चैत, काठमाडौं । बैंकको सञ्चालकमा ७० वर्षे उमेर हद राख्ने प्रस्ताव अघि बढेको छ ।

अर्थमन्त्री वर्षमान पुनले प्रतिनिधि सभामा दर्ता गरेको बैंक तथा वित्तीय संस्था सम्बन्धी ऐन, २०७३ लाई संशोधन गर्न बनेको विधेयकमा यस्तो प्रस्ताव गरिएको हो ।

प्रचलित ऐनमा बैंकको सञ्चालकमा मनोनीत वा निर्वाचित हुन २५ वर्ष उमेर पूरा भएको हुनुपर्ने प्रावधान छ । न्यूनतम उमेर हद रहेता पनि अधिकतम उमेर हदको विषय प्रचलित ऐनमा छैन ।

संशोधन विधेयकमा अधिकतम उमेर हद राख्ने प्रस्ताव गरिएको हो । प्रचलित ऐनको दफा १८ को उपदफा १ मा यस सम्बन्धी व्यवस्था राख्न प्रस्ताव गरिएको छ । जहाँ ‘२५ वर्ष पूरा नभएको र ७० वर्ष उमेर नाघेको’ व्यक्ति बैंकको सञ्चालक हुन अयोग्य हुने भनिएको छ । यसो गर्नुको कारणमा भनिएको छ, ‘सञ्चालकको मनोनीत वा निर्वाचित उमेर किटान गर्न आवश्यक भएकाले ।’

प्रस्तावित विधेयक जस्ताको तस्तै संसदबाट पारित भए ७० वर्ष नाघेका व्यक्ति बैंकको सञ्चालकमा मनोनीत वा निर्वाचित हुन अयोग्य हुनेछन् ।