![](https://www.onlinekhabar.com/wp-content/uploads/2024/08/bulaki1.jpg)
काठमाडौं । साउन ३२ गतेदेखि पुनःप्रदर्शन तयारीमा रहेको फिल्म ‘बुलाकी’ निर्माता यतिबेला प्रचारमा जुटेका छन् । कास्ट एण्ड क्रू दर्शकमाझ पुगेर फिल्म हेर्न आग्रह गरिरहेका छन् ।
प्रचारको नयाँ शैली आत्मसात गर्दै निर्माताले काठमाडौंमा सडक नाटक, नृत्य र गायन प्रस्तुति दिइरहेका छन् । प्रचारमा सर्वसाधारणको बाक्लो उपस्थिती पनि देखिएको छ । फिल्मले उठान गरेको कथावस्तु र प्रदर्शन मिति जानकारी गराउँदै दर्शक आकर्षण गर्न टोल-टोलमा पुगेको निर्माता तथा कलाकार विराज विष्टले बताए ।
लगनखेलमा दिइएको प्रस्तुतिमा सर्वसाधारण पनि सरिक भए । थिएटर कलाकार तथा मोडलसँगै गायक गायिकासहित फिल्मको प्रचार अभियानलाई अघि बढाइएको छ ।
नारीप्रधान भनिएको फिल्मको कथावस्तुको परिधिमा रहेर जनचेतनामुलक सडक नाटक प्रस्तुत गरिएको विष्टले बताए । शुक्रबारबाट अभिनेत्री सुरक्षा पन्त टिमसँग जोडिँदै छिन् ।
रिलिज मिति नजिकिँदै गर्दा खराब मौसमको बाबजुद प्रचार अभियानलाई निरन्तर अघि बढाइरहेको निर्माण टिमले बताएको छ । यो क्रम फिल्म रिलिजको अघिल्लो दिनसम्म चल्ने र काठमाडौंका मात्रै १८ ठाउँमा प्रस्तुति दिइने विष्ट बताउँछन् ।
बाक्लो भीडभाड हुने बसपार्क एरिया, विभिन्न पार्क, शान्तिवाटिका, भृकुटीमण्डप, विभिन्न सपिङ मल, खुल्ला मञ्च, बसन्तपुर, पाटन लगायतका ठाउँमा कलाकारसहित साक्षात्कार गरिने निर्देशक लक्ष्मण सुनारले बताए ।
पश्चिम नेपालमा विद्यमान जारी प्रथाको कथा उठान गरेको फिल्मलाई निर्माण ब्यानर छत्रेश्वरी म्यानेजमेन्टले नेपाली मौलिक फिल्म भन्दै आएको छ । चलचित्र विकास बोर्डबाट फिल्मले विशेष फिल्मको अवार्ड समेत प्राप्त गरेको छ ।
फिल्ममा सुरक्षा पन्तसँगै नरेन खड्का, विराज विष्ट, सरस्वती खत्रीको अभिनय छ । हालै यो फिल्मको अष्ट्रेलिया, यूरोप र बेलायतको प्रदर्शन अधिकार विक्री भैसकेको छ ।
प्रतिक्रिया 4