यी ५ क्रिसमस फिल्म जुन हेर्न सकिन्छ ओटीटीमा

काठमाडौं । मंगलबार क्रिसमस इभ मनाइँदैछ । यतिबेला विश्वभर क्रिसमसको माहोल छ । यो मेसोमा तपाईं फिल्मप्रेमी हुनुहुन्छ र क्रिसमसका कथामा बनेका फिल्ममा रुचि राख्नुहुन्छ भने केही फिल्म तपाईंको सूचीमा हुनसक्छन् ।

परिवारसँग बसेर क्रिसमस मुड जगाउने फिल्म हेर्नुको आनन्द बेग्लै हुनसक्छ । यस्ता फिल्मले माया गर्ने मान्छेप्रतिको योगदान र समर्पणको नैतिक सन्देश पनि दिन्छन् । तपाईं अन्य नियमित फिल्म छाडेर क्रिसमस फिल्म हेर्न चाहनुहुन्छ भने तपाईंका लागि ओटीटी प्लाटफर्ममा निकै रुचाइएका क्रिसमस फिल्म उपलब्ध छन् ।

होम अलोन

यो फिल्मलाई सर्वकालीन लोकप्रिय क्रिसमस फिल्म मानिन्छ, जहाँ म्याकुले कल्किनको अभिनय छ । अहिलेसम्म तपाईंले हेर्नुभएको छैन भने यो फिल्म अनिवार्य सिफारिसमध्ये पर्छ । फिल्मले आठ वर्षको केभिन र उसको क्रिसमसको साहसिक कार्यको कथालाई फिल्मले पेश गर्छ । बिदा मनाउन उसको परिवार फ्रान्सको यात्रामा निस्किंदा केभिन गल्तीले अलग हुन्छ । उसले कसरी न्युयोर्कमा क्रिसमस मनाउँछ यो रोचक कथा छ । यसले जीवनप्रतिको प्रेरणा, समस्या समाधानका उपायबारे पनि सिकाउँछ । यो फिल्म अमेजन प्राइममा उपलब्ध छ ।

क्लाउस

सन् २०१९ को एनिमेटेड फिल्मको मुख्य पात्र क्लाउस एक पोस्टम्यान (हुलाकी) हुन्छ जो रोयल पोस्टम्यान प्रशिक्षण एकेडेमीमा भर्ना भएको छ । फिल्मको शीर्ष भूमिका जेस्पर जोहानसेनले निर्वाह गरेका छन् । जब जेस्पर एकेडेमीमा सबैभन्दा खराब विद्यार्थी साबित हुन्छ, उसलाई बरफले जमेको उत्तरी सहरमा पठाइन्छ । त्यहाँ उसले क्लाउस नामक खेलौना बनाउने मान्छे फेला पार्छ । त्यसपछि जेस्पर र क्लाउसले हिउँले जमेको सहरमा सान्टा क्लजको कथा सिर्जना गरेर आनन्द ल्याउँछन् । यो फिल्म नेटफ्लिक्समा उपलब्ध छ ।

जिंगल अल द वे

अर्नोल्ड स्वार्जनेगर, सिनबाड, जेक लोयड र रीटा विल्सन अभिनित ‘जिंगल अल द वे’ एक पारिवारिक कमेडी फिल्म हो । यो फिल्म क्याबेज प्याच किड्स जस्ता वास्तविक जीवनको खेलौना बिक्री पसलको कथाबाट प्रेरित छ । यो क्रिसमस फिल्मले दुई प्रतिद्वन्द्वी पिता, हावर्ड र माइराओनलाई पछ्याउँछ । उनीहरूले आफ्ना छोराका लागि लोकप्रिय एक्सन फिगर, टर्बो–म्यान किन्न कडा प्रयास गर्छन् । यो फिल्म डिज्नी प्लस हटस्टारमा उपलब्ध छ ।

द पोलार एक्सप्रेस

यो अर्को लोकप्रिय क्रिसमस फिल्म सन् २००४ को पारिवारिक एड्भेन्चर फिल्म हो । सोही नामको बालबालिकाको पुस्तकमा आधारित यो फिल्ममा टम हान्स, डेरिल सबारा, नोना गे र जिमी बेनेटले अभिनय गरेका छन् । मोसन क्याप्चर र लाइभ–एक्सन एनिमेसन प्रयोग गरेर बनाइएको यो फिल्मलाई क्रिसमस पूर्वसन्ध्यामा सेट गरिएको छ । यसले उत्तरी ध्रुवतर्फ जाँदै गरेको एक रहस्यमय रेलको झ्यालमा देखिने एक जवान केटालाई पछ्याउँछ । जब उसलाई रेलमा चढ्न अनुमति दिइन्छ, त्यो केटाले कुनै हिच्किचाहट देखाउँदैन र सान्ता क्लासलाई भेट्ने यात्रामा निस्किएका अन्य बच्चासँगै सामेल हुन्छ । यो फिल्म नेटफ्लिक्समा उपलब्ध छ ।

मेरी क्रिसमस

‘मेरी क्रिसमस’ सन् २०२४ मा रिलिज भएको हिन्दी भाषाको थ्रिलर फिल्म हो । यसमा कट्रिना कैफ, विजय सेतुपति, अश्विनी कालसेकर र लुक केनीले अभिनय गरेका छन् । यो फिल्म फ्रेडरिक डार्डको फ्रान्सेली उपन्यास ले मोन्टे–चार्जमा आधारित छ । यो फिल्मले दुई अपरिचित पात्रलाई पछ्याउँछ जो भाग्यमानी रात मानिने क्रिसमसको पूर्वसन्ध्या भेट हुन्छन् । यद्यपि, रोमान्सको रात बिस्तारै दुःस्वप्नमा परिणत हुन्छ र तिनीहरूको कथाले नयाँ मोड लिन्छ । अचानकका घटनाले दुई मुख्य पात्रलाई आमनेसामने तुल्याउँछ । यो फिल्म नेटफ्लिक्समा उपलब्ध छ ।