एमालेको दबाबमा रोकियो भीम रावलको पूर्वनिर्धारित कार्यक्रम

२० पुस, विराटनगर । नेकपा एमालेको कारबाहीमा परेका नेता डा. भीम रावल यतिबेला एमालेकै अध्यक्ष केपी शर्मा ओलीको गृह प्रदेशमा छन् ।

शनिबार विराटनगर पुगेका नेता रावल दिउँसो सुनसरीको भरौलमा आयोजना हुने तेस्रो आमन्त्रित अन्तर्राष्ट्रिय भेट्रान फुटबल उद्घाटन समारोहमा सहभागी हुने कार्यक्रम तय भएको थियो ।

तर उनी सहभागी हुने भनिएको सो समारोह अन्तिम अवस्थामा रोकियो ।

विराटनगर विमानस्थलबाट सोझै कार्यक्रमस्थलतर्फ लागेका रावल भने बीच बाटोबाटै फर्कन परेको थियो ।

आयोजकका अनुसार उक्त कार्यक्रम अब २२ पुसमा उद्घाटन गर्ने कार्यक्रम तयारी भएको छ ।

आयोजकले मैदानको तयारी पूरा नभएका कारण प्रतियोगिता सरेको बताएको छ । यद्यपि रावल सहभागी हुने भएपछि आयोजकलाई नेकपा एमालेकै नेतृत्वले दबाब दिएको खुलेको छ ।

आयोजक भेट्रान फुटबल क्लबका अध्यक्ष विमल कार्कीका अनुसार एमालेले रावललाई कार्यक्रममा सहभागी नगराउन दबाब दिएको हो । क्लबका अध्यक्ष कार्की पूर्व राष्ट्रिय खेलाडी पनि हुन् ।

‘एमालेका साथीहरूले धेरै दबाब दिनुभयो, विवाद किन गर्नु खेलुकद उद्घाटन गर्न आउने कुरा, आमसभा त गरेको होइन,’ कार्कीले अनलाइनखबरसँग भने, ‘ बुझ्दै नबुझेपछि के लाग्छ र ?’

एमालेका केन्द्रीयस्तरका नेताले पनि रावल सहभागी हुने भनेपछि कार्यक्रम सार्न दबाब दिएको उनको भनाइ छ । राजनीतिक दबावका कारण प्रतियोगिताको उद्घाटन मिति सार्नपरेको उनको भनाइ छ ।

आयोजक क्लबका सचिव अधिकलाल चौधरीले मैदान हिलो भएका कारण दुई दिनपछि प्रतियोगिता सारिएको बताए । ‘हिजो केटाहरूले काम गर्दैथे, धेरै पानी लगाएर हिलो भयो,’ उनले भने, ‘आज गेम खेलाउन सकेनन् ।’

राजनीतिक हिसाबले कडा दबाब नभएपछि सामान्य गुनासो भनेको आएको स्वीकारे । ‘पोलिटिकल्ली स्ट्रिक्ली प्रेसर त आएन, तर सामान्य गुनासोहरू चाहीँ आए,’ उनले भने ।

काठमाडौंबाट रावल सोही कार्यक्रममा सहभागी हुन भनेर आएका थिए । तर एमालेको दबाबमा उद्घाटन स्थगित भएपछि उनी आफ्ना समर्थक भेटेर फर्कन बाध्य भए ।

नेकपा एमाले सुनसरी सचिव राम कोइराला प्रतियोगिता सार्नका लागि पार्टीले आयोजकलाई दबाब नदिएको दाबी गर्छन् । आज पार्टीको खेलुकद महासंघको कार्यक्रम भएको बताउँदै उनले पार्टीका युवाहरू महासंघको कार्यक्रममा सहभागी भएको बताए । ‘मैले दबाब दिएको होइन, साथीभाईलाई टुटफुट र विभाजनको पक्षमा कोही आउँछन् भने त्यतातिर चाहिँ तपाईंहरू नजानुहोस् भन्या हो,’ उनले भने ।

पार्टीका तर्फबाट दबाब नदिएको बताउँदै उनले अघि भने, ‘त्यहाँका साथीहरूले साथीका रुपमा १–२ दिनपछि गर्नुपर्छ भने होलान ।’

रावललाई विराटनगर विमानस्थलमा नेकपा एकीकृत समाजवादी र दुर्गा प्रसाईंका कार्यकर्ताले स्वागत गरेका थिए । रावलको सचिवालयका अनुसार शनिबार दिनभर कोशीमा भेला भएका शुभचिन्तकसँग रावल छलफलमा छन् ।

‘कार्यक्रम बिथोलिए पनि नियमित भेटघाटमा उहाँ हुनुहन्छ,’ सचिवालयका एक सदस्यले भने, ‘हामीले पाएको सूचनामा एमालेको उच्च नेतृत्वबाटै आजको कार्यक्रम रोक्न दबाब भएको रहेछ ।’