माघ ११ गतेदेखि विराट एक्स्पो

२२ पुस, विराटनगर । विराटनगर एक्स्पो माघ ११ गतेदेखि सुरु हुने भएको छ । उद्योग संगठन मोरङले आयोजना गर्ने एक्स्पो १० दिनसम्म सञ्चालन हुनेछ । आठौं विराट एक्स्पो डिग्री कलेज विराटनगरको मैदानमा हुनेछ ।

डिजिटल कोशी बिल्डिङ इनोभेशन एण्ड इन्भेष्टमेन्ट नाराका साथ सञ्चालन हुने एक्स्पोमा २६८ वटा स्टलहरु रहनेछन् ।

एक्स्पोमा ९ पेभिलियनमा बिराट बजार बिटुबीको १२ वटा, स्टार्टअप भिजन कोशी ह्याकाथुनको १२ वटा, रोजगार कोशीका लागि १२ वटा, व्यावसायीक सेवा प्रदायकको ४० वटा, अटोमोवाइल्सका २० वटा, औद्योगिक क्षेत्रका ७५ वटा, औद्योगिक, कर्पोरेट, कृषिका ७५ वटा स्टल रहनेछन् । एक्स्पोमा १ हजार ८ सय रोजगारीका लागि तालिम पनि दिने बताइएको छ ।

एक्स्पोमा स्टार्टअफ कन्फ्रेन्स, रोजगार कोशी, इनर्जी इफिसियन्सी, मेरो देश मेरो उत्पादनलगायत कार्यक्रम आयोजना गरिने विराट एक्स्पो २०२५ व्यवस्थापन समिति संयोजक भोलेश्वर दुलालले जानकारी दिए ।

एक्स्पो सञ्चालनका लागि ३ करोड खर्च लाग्ने उद्योग संगठन मोरङ अध्यक्ष राकेश सुरानाले जानकारी दिए । नयाँ उद्यमीलाई प्रोत्साहन गर्ने उदेश्यले एक्स्पो आयोजना गरिएको बताए ।