हरर फिल्म ‘ममी’बारे प्रियंका : तर्सिनुपर्ने दृश्यमा दर्शक नहाँसुन भनेर सचेत गराएकी छु

काठमाडौं । समर निरौलाको डेब्यु निर्देशन रहेको फिल्म ‘ममी’को पहिलो गीत सार्वजनिक गरिएको छ । सोमबार आयोजित समारोहमा एसडी योगीद्वारा संगीतबद्ध गीत ‘म त यसै नक्कली’ सार्वजनिक गरियो ।

गीतमा हर्क साउदको शब्द रचना र रिकेश गुरुङले एरेञ्ज छ । समीक्षा अधिकारी र विज्ञानी पराजुलीको स्वर रहेको गीतको भिडियोमा कलाकार दीया मास्के र प्रियंका कार्की फिचर्ड छन् ।

विक्रम स्वाँरको डान्स कोरियोग्राफी रहेको गीतमा निशाल पौडेलको छायांकन र टेकेन्द्र शाहको सम्पादन छ । हरर फ्यामिली ड्रामा ‘ममी’ले परिवारको प्रिय कुकुरको मृत्युुपछि छोरीले घरमा कालो बिरालो पाल्न थालेपछि घरमा हुन अप्रत्याशित घटनाको कथा पेश गर्छ ।

माघ २५ गतेदेखि रिलिज हुने फिल्ममा ‘बोक्सीको घर’ फेम्ड निर्देशक सुलक्षण भारतीको मुख्य भूमिका छ । फिल्ममा समीप निरौला, घनश्याम जोशी, आयुषी ढकाल, जेभिस श्रेष्ठ, गीत विष्टलगायतको पनि अभिनय छ ।

सो ट्वान्टी फाइभको प्रस्तुतिमा निर्माण भएको फिल्ममा समर निरौला र पूर्णिमा जोशीको पटकथा छ । निर्माता लोकराज जोशी र पूर्णिमा जोशी हुन भने कार्यकारी निर्मातामा सुमन कोइराला छन् ।

‘ममी’को छायाँकन निशाल पौडेल र शरद महतोले संयूक्त रुपमा गरेका हुन् । सम्पादन सुरेन महर्जनको छ । पाश्र्वध्वनिमा रोहित शाक्य, साउन्ड डिजाइनमा श्रवल आरपी, रङ संयोजनमा दीपेश चौधरी र संगीतकारमा एसडी योगी छन् ।

के भन्छिन् प्रियंका ?

उनले यसअघि ‘चि मुसी चि’, ‘माला’जस्ता हरर भनिएका फिल्ममा काम गरिन् । तर, यो फिल्मले तर्साउन नसकेपछि सामाजिक संजालमा ट्रोल बन्यो । तर, उनी आफैले अभिनय गरेका हरर फिल्मप्रति असन्तुष्ट रहेको बुझ्न सकिन्छ ।

आफ्ना हरर फिल्म हेर्दा आफैँलाई डर नलागेको घटना पनि उनले स्मरण गरिन् । उनले भनिन्, ‘मैले धेरै हरर फिल्ममा अभिनय गरेँ । अनि ती फिल्म हलमा हेर्दा मलाई नै डर लाग्दैन थियो ।’

आफ्ना हरर फिल्मबाट दर्शक नतर्सिएको उनको भनाइ छ । भन्छिन्, ‘हरर फिल्म दर्शकलाई डर पैदा गर्नसक्नुपर्छ । मैले हरर फिल्म खेल्ने तर दर्शक नै नतर्सिने । मेरो प्रतिष्ठा नै खराब हुन लागिसक्यो ।’ उनले ‘माला’लाई आफूले गरेको उत्कृष्ट हरर फिल्म भएको बताइन् ।

स्क्रिप्टमा फिल्म राम्रो भएपछि छायांकन गर्दा फिल्म झूर बन्ने गरेको उनको भनाइ छ । ‘प्रायः फिल्मको स्क्रिप्ट एकदमै राम्रो हुन्छ । फ्लोरमा गएपछि चिप्लिने हो । स्क्रिप्टको ३० प्रतिशत पनि पर्दामा उत्रदैन’ उनले भनिन् । जसको कारण हरर फिल्मप्रति आफूलाई ट्रमा हुने उनको भनाइ छ ।

यसकारण आफू ‘ममी’ फिल्मका निर्मातालाई भीएफएक्स लगायतका पक्ष राम्रो हुनुपर्छ है भनेर भनेको स्मरण उनले गरिन् । डराउनुपर्ने दृश्यमा दर्शक नहाँसुन् भनेर समेत निर्देशकलाई सजग गराएको उनले बताइन् ।