२०८१ पुष २३ गते १०:०० 
२३ पुस, काठमाडौं । टामी अब्राहमले इन्जुरी टाइममा गोल गरेपछि एसी मिलानले छिमेकी इन्टर मिलान विरूद्ध सानदार पुनरागमन गर्दै इटालियन सुपर कपको उपाधि जितेको छ ।
गएराति साउदी अरेबियाको रियादमा भएको खेलमा एसी मिलानले दुई गोलले पछि परेको स्थिति उल्टाउँदै इन्टरलाई ३-२ ले पराजित गर्दै च्याम्पियन बनेको हो ।
डिफेन्डिङ च्याम्पियन इन्टरले दुई गोलको अग्रता लिए पनि कायम राख्न सकेन । इन्टरका लाउतारो मार्टिनेजले पहिलो हाफको इन्जुरी टाइममा र केहदी टारेमीले दोस्रो हाफको दोस्रो मिनेटमै गोल गरेपछि २-० को अग्रता लिएको थियो । तर एसी मिलानले सानदार पुनरागमन गर्यो ।
मिलानका लागि ५२ औं मिनेटमा थियो हर्नान्डेजले फ्रि–किकबाट गोल गर्दै खेलमा फर्काएका थिए । त्यसपछि हर्नान्डेजकै पासमा क्रिस्टियन पुलिसिचले ८०औं मिनेटमा गोल गर्दै खेल बराबरी गरे । अनि टामी अब्राहमले खेल सकिन केही समय अघि निर्णायक गोल गर्दै मिलानलाई उपाधि जिताए ।
एसी मिलानले सन् २०१६ यता कुनै पनि उपाधि जितेको यो पहिलो पटक हो । मिलानले समग्रमा आठौं पटक इटालियन सुपरकप जितेको हो ।
प्रतिक्रिया 4