+
+

कांग्रेस महामन्त्रीलाई मीनेन्द्रको प्रश्न- अब संसद नचाहिने हो ?

अनलाइनखबर अनलाइनखबर
२०८१ पुष २३ गते १२:३२

२३ पुस, काठमाडौं । नेपाली कांग्रेसका नेता डा. मीनेन्द्र रिजालले पार्टीका महामन्त्री विश्वप्रकाश शर्माले लोकप्रिय मत ल्याउनेले पाँच वर्ष निरन्तर सरकार चलाउन पाउनुपर्ने भनी गरेको बहसप्रति प्रश्न गरेका छन् ।

मंगलबार काठमाडौंमा आयोजित एक कार्यक्रममा बोल्दै नेता रिजालले प्रत्यक्ष कार्यकारी र लोकप्रिय मत पाउनेले पाँच वर्ष सरकार चलाउनुपर्छ भन्नेले अब व्यवस्थापिका नराख्ने भनेको हो भनी प्रश्न गरे ।

नेता रिजालले भने, ‘सबैभन्दा धेरै मत पाउने पार्टीले पाँच वर्ष निरन्तर सत्ता चलाउन पाउनुपर्ने कुराले अब व्यवस्थापिका नराख्ने भन्ने कुरालाई जोड दिएको छ ।’

कांग्रेस र नेकपा एमालेको सरकार बनेपछि सत्तामा सहजै कसरि पुग्ने भन्ने बारे मात्रै बहस हुने गरेको उनले टिप्पणी गरे ।

नेता रिजालले अन्य राजनीतिक दलहरुमा पनि प्रत्यक्ष निर्वाचित कार्यकारी र सबैभन्दा धेरै मत पाउने पार्टीले पाँच वर्ष निरन्तर सत्ता चलाउन पाउनुपर्ने जस्ता विषयमा मात्रै बहस हुने गरेको उल्लेख गरे ।

यस्तो बहसले व्यवस्थापिकाप्रतिको उत्तरदायित्व अन्त्य हुने उनको आशंका छ । उनले भने, ‘आजको कारोबारी राजनीतिको मानसिकताबाट बाहिर निस्किन जरूरी छ ।’

कांग्रेस र एमालेको सरकार बनेपछि आजको बहस भोलि म सत्तामा मज्जाले कसरी पुग्नसक्छु भन्ने विषयमा मात्रै केन्द्रित रहेको उनको आरोप छ । ‘उदाहरणका लागि प्रत्यक्ष निर्वाचित कार्यकारी चाहियो भन्ने छ । किन हुनुपर्‍यो ? चाहे बाबुरामजीले भन्नुभएको होला, अथवा अरु कसैले भनेको होला, मेरै पार्टीको एक जना महामन्त्रीले भन्नुभएको छ,’ उनले सोधे, ‘किन भन्नुभएको छ भने सत्ता चलेको चल्यै गर्नुपर्‍यो ।’

कांग्रेसका महामन्त्रीको सुरु गरेको बहसले व्यवस्थापिका संसदको उत्तरदायित्व अन्त्य गर्ने उनको तर्क छ । ‘मेरो पार्टीको महामन्त्रीले सबैभन्दा धेरै मत पाउने पार्टीले पाँच वर्ष निरन्तर सत्ता चलाउनुपर्छ भन्नुभयो । बाबुरामजीले प्रत्यक्ष निर्वाचित कार्यकारी भएपछि सबै चल्छ भन्नुभयो । त्यो भनेको मतलब अब व्यवस्थापिका नराख्ने भनेको हो ? व्यवस्थापिकाप्रतिको उत्तरदायित्व अन्त्य गर्ने भनेको हो ?’ उनले प्रश्न गरे ।

नेता रिजालले थ्रेसहोल्ड बढाउनु भनेको कांग्रेस र एमाले बाहेकका अन्य राजनीतिक दलहरू नहोऊन् भन्न खोजेको बताए । ‘अर्को कसैले चुनाव हारेको दिन फेरि अर्को पटक जनतासँग गएर सत्ता बदल्नसक्छु भन्ने आत्मविश्वास भएमात्रै लोकतन्त्र बलियो हुन्छ,’ नेता रिजालले भने ।

यो खबर पढेर तपाईलाई कस्तो महसुस भयो ?
Khusi chhu

खुसी

Dukhi chhu

दुःखी

Achammit chhu

अचम्मित

Utsahit Chhu

उत्साहित

Akroshit Chhu

आक्रोशित

प्रतिक्रिया

भर्खरै पुराना लोकप्रिय
Advertisment

छुटाउनुभयो कि ?