२०८१ पुष २४ गते १४:४८ 
२४ पुस, काठमाडौं । जय ट्रफी मेन्स एलिट कप २०८१ अन्तर्गत बुधबार चौथो खेलमा त्रिभुवन आर्मी क्लब र बागमती प्रदेशबीच खेल भइरहेको छ ।
जनकपुरमा भइरहेको पहिलो दिनको खेलमा टस हारेर ब्याटिङको निम्तो पाएको आर्मीले आफ्नो पहिलो इनिङमा बलियो योगफल खडा गरेको छ । आर्मीको पहिलो इनिङ सकिएसँगै अहिले टी ब्रेक भएको छ ।
आर्मीले ६० ओभरमा ५ विकेट गुमाएर २७६ रन बनायो । आर्मीका ओपनर इमरान शेखले सर्वाधिक ७२ रन बनाए भने बसिर अहमद ५३ रनमा अविजित रहे । कुशल मल्ल पनि ३५ रनमा अविजित रहे भने तृतराज दास ४४ र भीम सार्की ३२ रनमा आउट भए ।
बागमतीका विपिन आचार्यले १३ ओभरमा ४५ रन खर्चेर ३ विकेट लिए भने कप्तान सन्दीप लामिछानेले २२ ओभरमा १०३ रन खर्चेर २ विकेट हात पारे । अब बागमतीले आफ्नो पहिलो इनिङ सुरू गर्ने छ ।
पहिलो खेलमा आर्मीले पुलिससँग ड्र खेलेको थियो भने बागमतीले मधेशसँग ड्र खेलेको थियो ।
प्रतिक्रिया 4