२०८१ पुष २९ गते १७:५० 
२९ पुस, काठमाडौं । विभागीय टोली त्रिभुवन आर्मी एफसीले एन्फा महिला राष्ट्रिय लिगअन्तर्गत सुपर लिगमा सोमबार बागमती युवा क्लबलाई ३-० ले पराजित गरेको छ ।
सातदोबाटोस्थित एन्फा कम्प्लेक्स मैदानमा भएको खेलमा आर्मीलाई जित दिलाउन सपना लामा, पुनम जर्घा मगर र चन्द्रा भण्डारीले एक-एक गोल गरे ।
सपनाले खेलको छैटौं मिनेटमै गोल गर्दै आर्मीलाई अग्रता दिलाएकी थिइन् । २२औं मिनेटमा पुनमले गोल गर्दै आर्मीको अग्रता दोब्बर बनाइन् । इन्जुरी टाइममा चन्द्राले गोल गर्दै आर्मीको जित पक्का गरिन् । आर्मीका विमला चौधरी पेनाल्टीमा गोल गर्न असफल भइन् ।
डबल राउण्ड रोबिनका आधारमा भइरहेको सुपर लिगमा आर्मीको यो तेस्रो जित हो । जितपछि ५ खेलबाट १० अंक जोडेको आर्मी दोस्रो स्थानमै छ । आर्मी अझै शीर्ष स्थानको एपीएफभन्दा २ अंकले पछि छ । एपीएफले एक खेल कम खेलेको छ ।
सुपर लिगमा बागमतीविरूद्ध आर्मीले दुवै खेलमा जित हात पारेको हो । यसअघि पहिलो खेलमै आर्मीले बागमतीलाई २-० ले पराजित गरेको थियो ।
प्रतिक्रिया 4