२०८१ माघ ६ गते २०:५९ 
६ माघ, काठमाडौं । विराटनगर ब्यान्डिट्सले आइतबार काठमान्डु माभरिक्सलाई रोमान्चक खेलमा ४४–४३ ले पराजित गर्दै नेपाल कबड्डी लिग (एनकेएल) मा लगातार दोस्रो जित हात पारेको छ ।
त्रिपुरेश्वरविस्थत कभर्ड हलमा भएको खेलको पहिलो हाफमा काठमाडौंको प्रदर्शन गतिलो भएन । उसलाई दुईपल्ट अलआउट गर्दै विराटनगर २२–४ ले अगाडि बढेको थियो । त्यसपछि कप्तान घनश्याम रोका मगरले उत्कृष्ट प्रदर्शन गर्दै काठमान्डुलाई लगातार अंक दिलाए र खेल १४–२२ को स्थितिमा पुर्याए । उनकै प्रदर्शनमा विराटनगरलाई अलआउट गर्दै काठमाडौंले दूरी छोट्याएको थियो ।
दोस्रो हाफमा काठमान्डुले उत्कृष्ट प्रदर्शन गर्यो । अन्त्यतिर घनश्यामले दुई खेलाडीलाई आउट गर्दै स्कोर ४१–४१ बनाए । तर, अन्तिम क्षणमा विराटनगरले निर्णायक अग्रता लियो र लगातार दोस्रो जित हासिल गर्यो ।
विराटनगरले पहिलो खेलमा धनगढी वाइल्डक्याट्सलाई पराजित गरेको थियो । सुरूवाती खेलमा काठमान्डुले पोखरा लेकर्सलाई हराएको थियो ।
दिनको दोस्रो खेलमा हिमालयन रेइडर्सले पोखरा लेकर्सलाई ३४–३० ले हराएर एनकेएलमा पहिलो जित हासिल गर्यो । बुटवलको हिमालयनले पहिलो खेलमा विराटनगरविरुद्ध हार व्यहोरेको थियो भने पोखराले लगातार दोस्रो हार व्यहोरेको हो ।
प्रतिक्रिया 4