२०८१ माघ ८ गते १३:१६ 
८ माघ, काठमाडौं । प्रधानमन्त्री कप महिला राष्ट्रिय क्रिकेट २०८१ मा त्रिभुवन आर्मी क्लबले दोस्रो जित निकालेको छ । मंगलबारको खेलमा आर्मीले कोशी प्रदेशलाई ९ विकेटले हराउँदै सुपर फोरमा स्थान पक्का गरेको छ ।
खराब मौसमका कारण ढिला सुरू भई ७ ओभरमा छोट्याइएको खेलमा कोशीले दिएको ३७ रनको लक्ष्य आर्मीले ४ बल बाँकी छँदा पूरा गर्यो । आर्मीका लागि ओपनर सम्झना खड्काले अविजित ३२ रन बनाइन् ।
त्यसअघि टस हारेर पहिले ब्याटिङ गरेको कोशीले ७ ओभरमा ५ विकेट गुमाएर ३६ रन बनाएको थियो । कोशीका लागि स्मृति कटुवालले सर्वाधिक १४ रन बनाइन् । आर्मीका लागि मनिषा चौधरीले ३ तथा सुस्मिता भुसालले २ विकेट लिइन् ।
पीएम कपमै पहिलोपटक सहभागिता जनाएको आर्मीले आइतबार भएको पहिलो खेलमा मधेशलाई २५ रनमा अलआउट गरेर प्रतियोगितामा शानदार सुरूवात गरेको थियो । दोस्रो खेलमा भने आर्मी बागमती प्रदेशसँग १४ रनले पराजित भएको थियो ।
समूह बी मा आर्मी ३ खेलबाट ४ अंकसहित शीर्षस्थानमा छ भने समान खेलबाट समान अंक भएको कोशी नेट रनरेटका आधारमा दोस्रोमा छ । अब बागमती र मधेश प्रदेशबीचको खेलपछि सुपर फोरमा पुग्ने अर्को टोलीको टुंगो लाग्नेछ ।
बागमतीले फराकिलो जित निकाल्दै कोशीलाई नेट रनरेटमा उछिनेमा वा मधेश विजयी भएमा कोशी बाहिरिनेछ र बागमती सुपर फोरमा पुग्नेछ ।
प्रतिक्रिया 4