२०८१ माघ ८ गते १५:३७ 
८ माघ, काठमाडौं । बागमती प्रदेश प्रधानमन्त्री कप महिला राष्ट्रिय क्रिकेट २०८१ को सुपर फोरमा प्रवेश गरेको छ । मंगलबार समूह बी को खेलमा मधेश प्रदेशलाई ७ विकेटले हराउँदै बागमतीले कोशी प्रदेशलाई नेट रनरेटमा उछिन्दै सुपर फोरमा स्थान पक्का गरेको हो ।
मधेशले दिएको ४१ रनको लक्ष्य बागमतीले ६.४ ओभरमा पूरा गर्यो । यशु पाण्डेले १९ रन बनाइन् भने कप्तान कञ्चन श्रेष्ठले ९ रन बनाउँदा विपिशा शाही विजयी चौकासहित ८ रनमा अविजित रहिन् ।
बागमतीले ८.२ ओभरभित्र लक्ष्य पूरा गरेमा दोस्रो स्थानको कोशी प्रदेशलाई उछिन्ने समीकरण थियो । सोही अनुरूप बागमतीले खेल जित्यो । मधेशका लागि रोजी कडारीले २ विकेट लिइन् ।
त्यसअघि टस हारेर पहिले ब्याटिङ गरेको मधेशले १५.५ ओभरमा अलआउट हुँदै ४० रन बनाएको थियो । मधेशका लागि साक्षी यादव र सरस्वती कुमारीले सर्वाधिक ६-६ रन बनाए ।
बागमतीका लागि कञ्चन श्रेष्ठले ४ ओभरमा १२ रन दिएर ४ विकेट लिइन् । त्यस्तै विपिशा शाहीले २ तथा मनिषा उपाध्याय र सोनु खड्काले १-१ विकेट लिए ।
यसै समूहबाट पीएम कपमा पहिलोपटक सहभागिता जनाएको आर्मीले पनि सुपर फोरमा स्थान बनाएको छ । रुबिना क्षेत्रीको कप्तानीमा रहेको कोशी प्रदेश भने बाहिरिएको छ ।
प्रतिक्रिया 4