२०८१ माघ ११ गते १७:०० 
११ माघ, काठमाडौं । अमृता जैसीले खेलको अन्तिम मिनेटमा गरेको एक मात्र गोल मद्दतमा बागमती युथ क्लबलाई पराजित गर्दै नेपाल पुलिस क्लब एन्फा महिला लिगको क्वालिफायर टु मा प्रवेश गरेको छ ।
सातदोबाटोस्थित एन्फा कम्प्लेम्समा शुक्रबार भएको इलिमिनेटरमा विभागीय टोली पुलिसले बागमती युथ क्लबलाई १-० ले पराजित गरेको हो । निर्धारित समयमा २ मिनेट थपिएको इन्जुरी टाइमको पनि अन्तिम क्षणमा मोनिका पुलामी मगरले दायाँ साइडबाट उपलब्ध गराएको पासमा अनमार्क रहेकी अमृताले पेनाल्टी बक्सबाट हेडमार्फत गोल गरिन् ।
महिला लिगमा बागमतीविरूद्ध पुलिस अपराजित रहेपनि इलिमिनेटरमा जित निकाल्न निकै संघर्ष गर्नुपर्यो । यसअघि लिगको पहिलो चरणमा पुलिसले बागमती युथ क्लबलाई १-० ले पराजित गरेको थियो । त्यसपछि सुपर लिगको पहिलो खेलमा २-० को जित हात पारेको पुलिसलाई अर्को खेलमा बागमतीले गोलरहित बराबरीमा रोकेको थियो ।
अब पुलिसले फाइनल प्रवेशका लागि एपीएफ क्लब र त्रिभुवन आर्मी एफसीबीच हुने क्वालिफायर वानको पराजित टोलीसँग क्वालिफायर टु मा खेल्नेछ ।
एपीएफ र आर्मीबीच शनिवार क्वालिफायर वान हुनेछ र यस खेलको विजेता सिधै फाइनल प्रवेश गर्नेछ ।
प्रतिक्रिया 4