२०८१ माघ ११ गते १७:३१ 
११ माघ, काठमाडौं । सुदूरपश्चिम प्रदेश प्रधानमन्त्री कप महिला राष्ट्रिय क्रिकेटको फाइनलमा प्रवेश गरेको छ । शुक्रबार भएको सुपर फोरको अन्तिम खेलमा बागमती प्रदेशलाई ३० रनले हराउँदै सुदूर फाइनलमा पुगेको हो ।
सुदूरले दिएको ११३ रनको लक्ष्य पछ्याएको बागमती २ बलअगावै ८२ रनमा अलआउट भयो । यशोदा विष्टले सर्वाधिक ३० तथा हेलिशा गुरुङले २३ रन बनाए । अन्यले दोहोरो अंकमा रन बनाउन सकेनन् ।
सुदूरका लागि कविता कुँवर र करिष्मा थापाले २-२ विकेट लिँदा आशिका महरा र रितु कनोजियाले १-१ विकेट लिए ।
त्यसअघि टस जितेर पहिले ब्याटिङ गरेको सुदूरले २० ओभरमा ७ विकेट गुमाएर ११२ रन बनाएको थियो । रितु कनोजियाले सर्वाधिक अविजित ३४ रन बनाइन् । मनिषा बोहराले १६ रन बनाइन् ।
बागमतीका लागि सोनु खड्का र मनिषा उपाध्यायले ३-३ विकेट लिए भने बिपिशा शाहीले १ विकेट लिइन् ।
सुदूरपश्चिमले अब उपाधिका लागि एपीएफसँग खेल्ने छ । फाइनल खेल शनिबार हुनेछ ।
प्रतिक्रिया 4