अध्ययन बिदा लिएर संघ-संस्थामा कार्यरत प्राध्यापकमाथि पनि त्रिविले थाल्यो छानबिन

१५ माघ, काठमाडौं । अध्ययन बिदा लिएर सरकारी तथा गैरसरकारी संघसंस्थामा काम गरिरहेका शिक्षकमाथी पनि त्रिविले अनुसन्धान थालेको छ ।

अध्ययन बिदा लिएर नफर्किने प्राध्यापकको खोजी गर्न गठित समितिले संघ संस्थामा कार्यरत प्राध्यापकमाथि पनि छानबिन गर्न लागेको हो ।

प्राध्यापकहरुले अध्ययन बिदा लिएर संघ संस्थामा काम गरिरहेको उजुरी परेपछि त्रिविले छानबिन गर्न लागेको हो । ‘हामीले पाएको टिओआर भित्र रहेर काम गरिरहेका छौं । अध्ययन बिदा लिएर नफर्किने, संघ संस्थामा काम गर्ने सबैको खोजी गरेर प्रतिवेदन तयार गर्छौं,’ खोजबिन समितिका संयोजक डा. जीवन काफ्लेले भने ।

अध्ययन बिदा लिएर नफर्किने प्राध्यापकबारे बुझ्न समितिले डीन, निर्देशक, क्याम्पस प्रमुखसँग पनि छलफल गर्ने भएको छ । अध्ययन बिदामा विदेशको जुन विश्वविद्यालयमा वा अन्य संस्थामा गएको हो त्यो ठाउँमा पत्राचार त्रिविले गर्ने भएको छ । अध्ययन बिदाको दुरुपयोग भएपछि नीतिगत सुधार पनि त्रिविले गर्ने भएको छ । ‘नीतिमा के परिमार्जन गर्न सकिन्छ सबै पक्षसँग राय सुझाव लिएर नीतिगत सुधारको पनि सिफारिस गर्छौ,’ समिति संयोजक काफ्लेले भने ।

समितिलाई तीन महिनाको समय दिइएको छ ।

विश्वविद्यालयको नियममा ५ वर्षसम्म अध्ययन बिदामा बस्न पाउने प्रावधान छ । ३ वर्षसम्म अध्ययन बिदा पूरा गरेकाले कम्तीमा ३ वर्ष र सोभन्दा बढी बिदा उपभोग गरेकाले कम्तीमा ५ वर्ष सेवा गर्नुपर्ने व्यवस्था छ ।

यदि नफर्किएमा वा सेवा नगरेमा खाएको तलब १२ प्रतिशत ब्याजसहित फिर्ता गर्नुपर्ने नियम छ । बिदामा बस्दा शिक्षकले नेपाली कागजमा फर्किने कबुलियतनामा गरेको हुन्छ । नफर्किएमा जायजेथाबाट भएपनि खाएको रकम असुल गर्ने भनिएको छ ।

२०४५ सालदेखि अध्ययन बिदामा गएका त्रिविका शिक्षक फर्किएका छैनन् । कति फर्किए कति फर्किएका छैनन् भन्ने तथ्यांक त्रिविसँग नभएपछि खोजबिन गर्न समिति बनाइएको हो ।

यो पनि पढ्नुहोस

अध्ययन बिदामा विदेश गएका त्रिविका प्राध्यापक उतै लुक्छन्