गुल्मीमा अशक्तलाई घरमै पुगेर नागरिकता प्रदान

१९ माघ, गुल्मी । जिल्ला प्रशासन कार्यालय गुल्मीले अशक्तको घरमै पुगेर नागरिकता प्रदान गरेको छ ।

रेसुङ्गा नगरपालिका–७ नेटा निवासी ‘क’ वर्गका अपाङ्गता भएका नवीन मरासिनीलाई घरमै पुगेर नागरिकता प्रदान गरिएको हो ।

प्रमुख जिल्ला अधिकारी जनार्दन गौतम, रेसुङ्गा नगरपालिकाका मेयर खिलध्वज पन्थीसहितको टोलीले घरमै पुगेर मरासिनीलाई नागरिकता प्रदान गरेको हो ।

२०६४ साल फागुन १७ गते जन्मिएका मरासिनीे जन्मेको केही समयपछि शरीर चल्न छोडेको थियो । उनी हिँडडुल गर्न नसक्ने भएकोले नागरिता प्राप्त गर्न सकेका थिएनन् ।

मरासिनी सानै उमेरमा एक्कासी बिरामी परेपछि थलिंदै गएर पूर्ण रुपमा अशक्त बनेको परिवारले जनाएको छ । उनलाई आमा गोमा मरासिनीले स्याहार–सुसार गर्दै आएकी छन् ।

गोमाका २ छोरा र एक छोरी छन् । त्यसमध्ये नवीन कान्छो छोरा हुन् । घरमै यसरी आएर सेवा प्रदान गरेकोमा खुसी लागेको उनले बताइन् ।

नागरिकता प्रदान गर्दै प्रमुख जिल्ला अधिकारी गौतमले अपाङ्गता भएर प्रशासन कार्यालयसम्म आउन नसक्ने नागरिकलाई घरमै पुगेर सेवा दिने कार्यालयको अभियान स्वरुप मरासिनीलाई नागरिकता प्रदान गरेको बताए ।

यसअघि पनि जिल्ला प्रशासन कार्यालय गुल्मीले स्थानीय सरकारको समन्वयमा अशक्तहरुका लागि घरमै पुगेर नागरिकता प्रदान गर्दै आएको छ ।

नवीले नागरिकता पाएसँगै सरकारबाट पाउने सेवा लिनका लागि पनि बाटो खुलेको छ ।

घरमै नागरिकता प्रदान गर्ने कार्यक्रममा पुगेका रेसुङ्गा नगरपालिकाका मेयर खिलध्वज पन्थीले नगरपालिकाको नीति पनि पञ्जीकरण लगायतका कामहरु अशक्तको घरमै पुगेर सेवा प्रदान गर्ने रहेको बताए ।

प्रशासन कार्यालयले यस आर्थिक वर्षको केही समयअघि मदाने गाउँपालिका–४ निवासी ‘क’ वर्गका अपाङ्गता भएका नारायण सेन ओलीलाई नागरिकता प्रदान गरेको थियो ।