छनोट समिति संयोजकका भान्जाको उम्मेदवारीबारे भीसीका ७ उम्मेदवारले उठाए प्रश्न

२० माघ, काठमाडौं । काठमाडौं विश्वविद्यालयको उपकुलपति छनोट समितिका संयोजक सुरेशराज शर्माका भान्जाले पनि आवेदन दिएको विषयमा प्रश्न उठेको छ ।

उपकुलपतिका लागि उम्मेदवारी दिएका ७ जना उम्मेदवारले यो विषयमा प्रश्न उठाएका हुन् । उनीहरूले कुलपति समेत रहेका प्रधानमन्त्री केपी शर्मा ओलीलाई पत्र लेख्दै विश्वविद्यालयप्रति नकारात्मक धारणा बढेको उल्लेख गरेका छन् ।

साथै, उनीहरूले प्रारम्भिक छनोटमा पनि उनीहरूको नाम परेकोमा आपत्ति जनाएका छन् ।

समिति संयोजक शर्माका भन्जा प्रा.डा. नवीन पोखरेल र प्रा.डा. मनीष पोखरेलले पनि उपकुलपतिका लागि आवेदन दिएका छन् ।

‘सिफारिस समितिले आफैँले जारी गरेको कार्यविधि अनुसार नै सुम्पिएको कार्य गर्ने सन्दर्भमा उक्त समितिका संयोजकका दुई जना भान्जाहरू आवेदक भइरहँदा पनि प्रारम्भिक आवेदनको छनोटमा उहाँहरू पर्नुबाट समितिले कार्यविधिका परिधिमा रहि कार्य सम्पन्न गरेको देखिएन,’ कुलपतिलाई लेखिएको पत्रमा भनिएको छ ।

छनोट समितिले प्रारम्भिक छनोट तालिका सार्वजनिक नगरेकोमा नकारात्मक धारणा बढेको उपकुलपतिका उम्मेदवारहरूको निष्कर्ष छ ।

यो पनि पढ्नुहोस

छनोट समिति संयोजकका भान्जा पनि भीसीका उम्मेदवार

‘हालका दिन सम्म पनि प्रारम्भिक छनौट तालिका सम्म ननिकाली ‘यदि’, ‘तर’, ‘पनि’ जस्ता शब्दजालमा अल्झिइ उक्त प्रक्रिया लम्बाउँदा विश्वविद्यालय नेतृत्वविहीन भई विश्वविद्यालयप्रति नकारात्मक धारणा बढेको हाम्रो धारणा छ,’ ध्यानकर्षण पत्रमा भनिएको छ ।

समितिका संयोजकले पदावधि समाप्त भएका र पुनः उपकुलपतिका लागि आवेदन दिएका प्राडा भोला थापालाई निरन्तरता दिन कुलपतिलाई गरेको सिफारिसमा पनि ७ उम्मेदवारले प्रश्न उठाएका छन् ।

‘पूर्व उपकुलपतिको नाम अर्को व्यवस्था नहुन्जेल पुनः निरन्तर गरिदिन भनि कुलपति तथा प्रधानमन्त्रीज्यूसमक्ष सिफारिस गरेको भन्ने कुरा जानकारीमा आएको छ,’ पत्रमा भनिएको छ, ‘भलै उक्त सिफारिसलाई मान्यता नदिइ विश्वविद्यालयको विधिविद्यान अनुरुप नै कार्य जिम्मेवारी सुम्पिनु भएकोमा कुलपति तथा प्रधानमन्त्रीज्यूप्रति आभार पनि व्यक्त गर्न चाहन्छौं ।’

अनधिकृत प्रवेश गरी संयोजक शर्माले कामु उपकुलपतिका लागि सिफारिस गरेको निष्कर्ष प्राध्यापकहरूको छ ।

‘विश्वविद्यालयको विधिविधानले स्पष्ट गरेको प्रावधानमा अनधिकृत प्रवेश गरी अन्यथा सिफारिस गर्ने संयोजकले निष्पक्षता र पारदर्शिता कायम गरेर विश्वविद्यालयको हितमा हुनेगरी उपकुलपतिको नाम सिफारिस गर्ने आधार देखिएन,’ ध्यानकर्षणपत्रमा भनिएको छ ।

अन्य उम्मेदवारहरूप्रति समिति संयोजक पूर्वाग्रही देखिएको आशंका प्राध्यापकहरूको छ । ‘समितिका संयोजकको कार्यशैली तथा उहाँमा देखिएको भान्जाहरू तथा निवर्तमान उपकुलपति मोहले सिफारिस प्रक्रियामा उपकुलपतिका अन्य उम्मेदवारहरूप्रति पूर्वाग्रही व्यवहार हुने देखिदा कुलपति तथा प्रधानमन्त्रीज्यूसमक्ष ध्यानाकर्षणसहित यस विषयमा आवश्यक कारवाहीका लागी अनुरोध गदछौं,’ पत्रमा भनिएको छ ।

ध्यानकर्षण गराउनेमा उपकुलपतिका उम्मेदवार प्रा.डा हरि प्रसाद न्यौपाने, प्रा.डा धिरज गिरी, प्रा.डा वेदमणि दहाल, प्रा.डा कन्हैया झा, प्रा.डा विभुति झा, प्रा.डा बालचन्द्र लुईंटेल र प्रा.डा श्याम नारायण लाभ छन् ।

छनोट समितिले भने उपकुलपतिका लागि दोस्रो पटक आवेदन माग गरेको छ । नाम सिफारिस गर्न गठित खोज तथा सिफारिस समितिले स्नातकोत्तर उत्तीर्ण गरेकाले पनि आवेदन दिन पाउने गरी कार्यविधि संशोधन गरेर दोस्रो पटक आह्वान गरेको हो ।

१८ माघमा छनोट समितिले आवेदनका लागि ७ दिनको समय दिइएको छ ।

पहिलो पटक आवेदन माग गर्दा केयूकै मेडिकल डाक्टरहरूले आवेदन दिन नपाएपछि कार्यविधिमा परिमार्जन गरिएको हो । पहिलो पटक १७ जनाले उपकुलपतिका लागि आवेदन दिएकोमा १६ जनाको स्वीकृत भइसकेको छ ।

यो पनि पढ्नुहोस

‘भीसी छनोट समितिलाई प्रभावित गरेको छैन, डा. रामकण्ठसँग टकराव होइन’