०६४ को माया पचाउन सकिएन, जनतामा फर्कने कसम खाएको छु : प्रचण्ड

२२ माघ, काठमाडौं । नेकपा माओवादी केन्द्रका अध्यक्ष पुष्पकमल दाहाल प्रचण्डले ०६४ को निर्वाचनमा जनताले गरेको माया पचाउन नसक्दा पार्टी कमजोर बन्न पुगेको स्वीकार गरेका छन् ।

मंगलबार म्याग्दीको बेनीमा आयोजित खबरदारी सभालाई सम्बोधन गर्ने क्रममा अध्यक्ष प्रचण्डले अब जनतातिरै फर्कने कसम आफूले खाएको पनि दाबी गरे ।

‘हामी माओवादीहरूलाई पहिलो चोटी जनताले अपार विश्वास गरेकै हो । कांग्रेस र एमाले त कता हो कता तल पारिदिएकै हो । हामीलाई तपाईंहरूले गरेको माया पनि पचेन । पचाउन सकिएन । हामीले भुइँ छाड्न थालियो,’ प्रचण्डले सम्बोधनको क्रममा भने ।

साथै, उनले सम्पूर्ण तागत जनताकै भएकाले आफू कसम खाएरै जनताको दैलोमा फर्किएको दाबी गरे ।

‘आखिर हाम्रो तागत जनताको तागत नै हो । हामी हिजो जंगलमा थिएनौं । जनताको काखमा थियौं । अहिले हामी काठमाडौंको जंगलमा भयौं । त्यहाँ पनि मजदुर र किसान छन् । ती समुदायसँग सम्बन्ध स्थापित गर्ने र जनतातिर फर्कने कसम खाएर म देशभर हिँडिरहेको छु,’ प्रचण्डले भने ।

उनले आफ्नै छोराछोरी सम्झेर माओवादीलाई माफी गरिदिन पनि आग्रह गरेका छन् ।

‘हामीले केही त्रुटि गर्‍यौं । हामीले जुन वर्ग समुदायका लागि लडाईं लडेका थियौं, त्यो समुदायसँग हाम्रो सम्बन्ध कमजोर हुँदै गयो । शंका पैदा हुने वातावरण पैदा हुँदै गयो । त्यसकारण पनि जनतामा एउटा निराशा र असन्तुष्टि बढ्दै गयो,’ प्रचण्डले भनेका छन्, ‘अब एकचोटी गल्ती सच्याउने, आफ्नै वर्गतिर फर्कने, फेरि शहिद, अपाङ्ग, दलित, आदिवासी जनजाती, मजदुर किसान, मुस्लिम, थारु, मधेशीको निम्ति फर्कने संकल्प गरेका छौं ।’