जसपा नेपालको अध्यादेश अध्ययन कार्यदलको बैठक बुधबार पनि

२२ माघ, काठमाडौं । जनता समाजवादी पार्टी (जसपा) नेपालको अध्यादेश अध्ययन कार्यदलको बैठक बुधबार पनि बस्ने भएको छ ।

मंगलबार सिंहदरबारमा विज्ञहरूसँग छलफल गरेको कार्यदलले बुधबार पनि विज्ञहरूसँग राय लिन लागेको हो ।

बुधबार अध्यादेशबारे धारणा बनाएर बिहीबार पार्टीको संसदीय दलको बैठकमा अध्यादेशबारे सुझाव प्रतिवेदन बुझाउने कार्यदलको तयारी छ ।

सरकारले संसद् नरहेका बेला सरकारले ल्याएका अध्यादेशबारे धारणा बनाउन जसपा नेपालले राजकिशोर यादवका नेतृत्वमा कार्यदल बनाएको हो । कार्यदलका संयोजक यादवका अनुसार बुधबार दिउँसो १ बजे कार्यदलको बैठक राखिएको छ ।

बिहीबार नै प्रतिनिधि सभा र राष्ट्रिय सभामा सरकारले ल्याएका विभिन्न ६ वटा अध्यादेश निर्णयार्थ पेस हुँदैछन् । त्यस अगाडि पार्टीको धारणा तय गरेर अध्यादेश स्वीकार गर्ने कि नगर्ने भनेर जसपा नेलालले निर्णय लिन लागेको हो ।

मन्त्रिपरिषद्को सिफारिसमा गत पुस १४ गते राष्ट्रपति रामचन्द्र पौडेले सहकारी सम्बन्धी केही नेपाल ऐनलाई संशोधन गर्ने अध्यादेश २०८१ जारी गरेका थिए ।

यो पनि पढ्नुहोस

अध्यादेश स्वीकार वा नकारमा उपेन्द्र यादव निर्णायक

पुस २९ गते थप चार वटा अध्यादेश जारी भयो । माघ २ गते अर्को एउटा अध्यादेश जारी गरेको थियो । ६ वटै अध्यादेश गत शुक्रबार दुवै सदनमा प्रस्तुत भएको थियो ।

अध्यादेशलाई संघीय संसद्को दुवै सदनले स्वीकृत गर्नुपर्छ ।

सरकारले यही माघ २४ गते अध्यादेशलाई दुवै सदनमा निर्णयार्थ प्रस्तुत गर्ने तयारी गरेको छ । विपक्षी दलहरूले भने अध्यादेश अस्वीकृत गर्नका लागि विरोधको सूचना दर्ता गरेका छन् । प्रतिनिधि सभामा ५० वटा र राष्ट्रिय सभामा १६ वटा अस्वीकृतको सूचना दर्ता भएको छ ।

विपक्षमा रहेका दलहरू माओवादी केन्द्र, एकीकृत समाजवादी पार्टी लगायतले अध्यादेश अस्वीकृत गर्ने भनेर सूचना नै दर्ता गरिसक्दा समेत जसपा नेपालले निर्णय लिन सकेको छैन ।

प्रतिनिधि सभामा सत्तापक्षमा प्रष्ट बहुुमत छ । तर, राष्ट्रिय सभामा जसपा नेपालको मत निर्णायक छ । यसकारण जसपा नेपालले अध्ययन नै गरेर निर्णय लिन लागेको हो ।

५९ सदस्यीय राष्ट्रिय सभामा कांग्रेस (१६), नेकपा एमाले (१०) र लोकतान्त्रिक समाजवादी पार्टी (१) गरेर २७ जना सांसद छन् । यो बहुमत होइन । मनोनीत सांसद डा. अन्जान शाक्य नेकपा एमाले समर्थित हुन् । उनलाई समेत जोड्दा सत्तापक्षको सांसद संख्या २८ पुग्छ ।

राष्ट्रिय सभामा विपक्षी दलहरूसँग माओवादी केन्द्र (१७), नेकपा एकीकृत समाजवादी (८) र राष्ट्रिय जनमोर्चा (१) गरेर २६ जना सांसद छन् । जनता समाजवादी पार्टी नेपालका तीन जना सांसद छन् । यो पार्टीले अध्यादेश जसलाई साथ सदन्छ उतै बहुमत पुग्ने सम्भावना रहन्छ ।

मनोनीत सांसद वामदेव गौतम पनि कतै खुलेका छैनन् । अर्का मनोनित सांसद नारायण दाहाल सभाको अध्यक्ष छन् । दुवै पक्षमा बराबर मत भए मात्रै उनले मतदान गर्न पाउँछन् ।