२०८१ माघ २५ गते ७:५८ 
२५ माघ, काठमाडौं । लिभरपुल इंग्लिस फुटबल लिग (ईएफएल) कपको फाइनलमा प्रवेश गरेको छ । बिहीबार राति घरेलु मैदान एनफिल्डमा भएको दोस्रो लेगको खेलमा टोटनहमलाई ४-० को फराकिलो अन्तरले हराउँदै लिभरपुल फाइनलमा पुगेको हो । लिभरपुलको जितमा कोडी गाक्पो, मोहमद सालाह, डोमिनिक सोबोस्लाइ र भर्जिल भान डाइकले १-१ गोल गरे ।
समग्रमा लिभरपुल ४-१ ले विजयी भएको हो । पहिलो लेगमा लिभरपुल १-० ले पराजित भएको थियो । तर दोस्रो लेगमा लिभरपुलले पुनरागमन गर्दै जित निकाल्यो उपाधि नजिक पुगेको हो ।
३४औं मिनेटमा गाक्पोले गोल गर्दै लिभरपुललाई पहिलो हाफमा १-० को अग्रता दिलाएका थिए । दोस्रो हाफमा लिभरपुलले तीन गोल थप्यो । ५१औं मिनेटमा सालाहले पेनाल्टीमा गोल गर्दै लिभरपुलको अग्रता दोब्बर पारे । ७५औं मिनेटमा सोबोस्लाइ र ८०औं मिनेटमा भान डाइकले गोल गर्दै लिभरपुलको ४-० को जित पक्का गरे ।
लिभरपुलले अब उपाधिका लागि न्युकासल युनाइटेडसँग खेल्ने छ । न्युकासलले सेमिफाइनलमा आर्सनललाई पराजित गर्दै फाइनल पुगेको हो । साविक विजेता समेत रहेको लिभरपुलले सर्वाधिक १० पटक इएफएल कपको उपाधि जितेको छ ।
प्रतिक्रिया 4