कोटिहोमको नाममा पोखराका रूखबिरुवा ठुटो बनाएका कृष्णमूर्तिको विवादास्पद अभिव्यक्ति

२६ माघ, पोखरा। ठगीदेखि पशुपतिमा भएको कोटिहोमसम्ममा विवादित बनेका बालयोगेश्वर विजय कृष्णमूर्ति भनिने विजय भण्डारीको मानव सेवा फाउण्डेसनले पोखरामा गर्न लागेको कोटिहोम सुरु नहुँदै विवादित बनेको छ ।

कोटिहोमका नाममा पोखराका ऐतिहासिक चौताराका वर, पीपल, समी मुठारेपछि फाउण्डेसनमाथि प्रश्न उठेको थियो भने संरक्षण गर्नुपर्ने दायित्व बोकेको पोखरा महानगरको पनि आलोचना भएको थियो ।

कृष्णमूर्ति नेतृत्वमा आगामी वैशाखमा हुने भनिएको कोटिहोमको विवादले अहिले पोखरा महानगर र फाउण्डेसन नै आमने–सामने बनेको छ भने यो कोटिहोम आयोजना गर्न दिने कि नदिने भन्ने पक्ष विपक्षमा आवाज उठिरहेको छ ।

पोखराका मेयर धनराज आचार्यले फेवा किनारमा कोटिहोम हुन नसक्ने बताएका छन् भने कार्यपालिका बैठकले नै निर्णय गरेर नेपाल ट्रस्टलाई पत्राचार समेत गरिसकेको छ । बैठकपछि महानगरले चौताराका वर, पीपल, समीका रूख काट्नेलाई कारबाही गर्न डिभिजन वन कार्यालयमा पत्राचार समेत गरेको छ ।

नेपाल ट्रस्टको जग्गा भाडामा लिएर कोटिहोम गर्न फाउण्डेसनले साढे ११ लाख रुपैयाँ शुल्क पनि बुझाइसकेको छ । मेयर आचार्य नेतृत्वको कार्यपालिका बैठकले महायज्ञका निम्ति जग्गा उपलब्ध नगराउन पत्राचार नै गरेपछि बालयोगेश्वर भनिने विजय भण्डारीले आइतबार बिहान पत्रकार सम्मेलन नै गरेका छन् ।

यज्ञ सुरु नहुँदै विवादित बनेका भण्डारीले पोखरामा कुनै पनि हालतमा कोटिहोम गरेरै छाड्ने मात्रै बताएनन्, अर्को अराजक तथा विवादास्पद अभिव्यक्ति पनि दिएका छन् ।

‘अब कुनै पनि हालतमा यो यज्ञ कसैले रोकेर पनि रोकिनेवाला छैन। यो कुरा मैले तपाईंहरुलाई प्रष्ट रुपमा भन्छु, यो कसैले रोकेर रोकिनेवाला छैन’ भण्डारीले चेतावनी सहितको वाक्य बोले, ‘बालयोगेश्वर यहाँ यज्ञ नगरिकन फर्किन्नँ। जुन ठाउँमा यज्ञ आयोजना हुने हो, जुन मितिमा हुने हो, जुन किसिमले हुने हो, यसमा बरु विराट होला, भव्य होला । त्यसमा कुनै कमि हुँदैन।’

भण्डारीमा यतिमै रोकिंदैनन्, अझै मुठभेड नै सिर्जना हुने खालको विवादास्पद अभिव्यक्ति दिए । ‘यो कुरामा जस्तोसुकै मूल्य चुकाउन पनि ज्यान हत्केलामा राखेर हामी चाहिं हिंडेको यसअघि पनि, त्यो कुरा छँदैछ । धर्मको लागि सनातनको लागि, धर्मका लागि अधर्म पनि गर्नपर्छ भने बालयोगेश्वर विजय कृष्णमूर्ति तयार छ भनिदिनुहोला ।’

यदि कोटिहोम गर्न दिइएन भने लड्न परे पनि लड्छौं भन्ने विषयलाई अधर्म भनेको भन्दै भण्डारीले पछि सच्याउन खोजेका थिए । वैशाख १ गतेदेखि जेठ १५ गतेसम्म ४५ दिन हुने भनिएको कोटिहोम कुनै पनि हालतमा नरोकिने र महानगरले पनि सहयोग गर्ने उनको दाबी थियो ।

यसअघि पनि उनीमाथि ठगी आरोपमा फौजदारी अभियोग लागेको, पशुपतिमा भएको कोटिहोममा पनि घाटा लागेको भनेको विषयमा पनि भण्डारीले स्पष्टीकरण दिन खोजे । उनले आफूमाति विगतमा षडयन्त्र गर्दै अभियोग लगाइए पनि आफूले कसैको एक रुपैयाँ नखाएको दाबी गरे ।

कृष्णमूर्ति वैदेशिक रोजगार र अमेरिका लैजान्छु भनेर ठगी गरेको आरोप समेत गरी ५ पटकसम्म पक्राउ परेका रेकर्ड छ । तर, उनले भने आफ्नो कुनै न्यायालय वा निकायमा आपराधिक रेकर्ड नभएको कागज देखाउँदै जिकिर गरे ।

कुनै पनि न्यायालयमा आफूमाथि फौजदारी अभियोग नभएको दाबी गर्दै उनले त्यस्तो भेटिएर पोखरा हुन लागेको यज्ञ नै छोडेर हिंड्ने दाबी समेत गरे । ‘कसैको एक रुपैयाँ ठगेका पनि छैनौं, लुटेका पनि छैनौं । कसैलाई मारेका पनि छैनौं, कसैको चेलीबेटी बिगारेका पनि छैनौं। अर्को कुरा ममाथि अभियोग लगाइयो, प्रमाणित भएनन्, सर्वोच्चले यो अभियोग प्रमाणित हुँदैन, मेलमिलाप गर्न भन्यो’ उनले भने, ‘मेलमिलापबाट सबै कुरा टुंगिएको छ।’

उनले पत्रकार सम्मेलनमै प्रहरीले दिएको आपराधिक गतिविधि गरेको अभिलेख नभएको कागज समेत देखाए। भण्डारीले पोखरामा हुने कोटिहोमले पोखरा तथा गण्डकीकै धार्मिक तथा पर्यटकीय सम्भावनाको उजागर गर्ने, सबैलाई फाइदा पुग्ने बताए ।

यो पनि पढ्नुहोस

धर्मको आवरणमा विवादित कृष्णमूर्ति : पोखराका रूख मठार्न राज्य नै सहयोगी

उनले पशुपतिनाथमा ७५ लाख रुपैयाँ घाटा भएको बरु खर्चका निम्ति अपुग भएको भनिएको भन्ने तर्क गरे । कोटिहोम सम्पन्न गर्न २५ करोड रुपैयाँ खर्च लाग्ने, अहिले नै पोखराको ५/७ होटलमा स्वयंसेवक बसिरहेको र कोटिहोमका बेला २५ वटा होटल बुकिङ गरिने बताए ।

भण्डारीले वडादेखि महानगरसम्मको अनुमतिमै रूखका हाँगा काटिएको भए पनि अनुमति लिएको पत्र भने देखाउन सकेनन् । उनले रूखका हाँगा छिमल्दा अलि धेरै काटेर गल्ती गरेको भए सजाय भोग्न तयार रहेको समेत बताए ।

कोटिहोमको नाममा पोखराका ऐतिहासिक चौताराका वर, पीपल, समीका रूख काटिएपछि चौतर्फी आलोचना भएको थियो । मेयर आचार्यले अनुमति नलिई रूख काटेको भन्दै काठ नै जफतसमेत गरेका थिए । तर, फाउण्डेसनले भने महानगरले नै काटेर शान्तिवन दमकलको कार्यालय भएको ठाउँको काठ दिएको थियो तर त्यही काठ महानगरले जफतको नाममा ताला फुटाएर लगेको दाबी गरेको छ ।

फेवाताल किनारमा त्यति लामो कार्यक्रम हुन नसक्ने मेयर आचार्यले दोहोर्‍याएका छन् । ‘अन्यत्र धार्मिक स्थलहरुमा, अन्य खुला ठाउँहरुमा त्यहाँ स्थानीयले पनि सहमति जनाएर आए भने, लामो समयको कार्यक्रमका लागि आए भने हाम्रो वातावरण समिति छ, प्रशासनको एउटा युनिट हुन्छ, नगर प्रहरी हुन्छ ।

उनीहरु सबैको टिमले राय सल्लाहको आधारमा दिने नदिने निर्णय गर्छौं,’ आचार्यले भने । विज्ञापन गरिएको छ भने त्यसको राजश्व लिने गरेर मात्रै अनुमति दिने नदिने भन्ने कुरा हुने आचार्यको भनाइ थियो । भण्डारीले पोखराकै धार्मिक क्षेत्रमा र मानव सेवा आश्रमका लागि यहाँबाट पैसा उठ्यो भने खर्च गरिने बताए ।

अहिलेसम्म कुनै महायज्ञ गर्दा अनुमति लिने चलन नभएको र आफूले लिन जाँदा पनि विवादित बनाउन खोजिएको जिकिर गरे ।

सोझो कुरा भइरहेजस्तो लाग्दैन : मेयर आचार्य

पोखराका मेयर धनराज आचार्यले यतिका लामो समय गर्ने गरी हुन लागेको भनिएको कोटिहोममा सोझो कुरा भइरहेको जस्तो नलागेको प्रतिक्रिया दिए । विना अनुमति कसैले काम गर्न सक्छु भनेर धाकधम्की नगर्न समेत उनको सुझाव छ ।

ऐन, नियम कानुन सबैले मान्नुपर्ने र योभन्दा माथि गएर कसैले बोल्न नमिल्ने मेयर आचार्यले बताए । ‘उहाँलाई मैले व्यक्तिगत रुपमा चिन्दिनँ र आजसम्म मैले भेटेको पनि छैन । उहाँले मेयरलाई भनेको छु भनेको सुनियो’ आचार्यले भने, ‘म व्यक्तिगत धनराज आचार्यको कुरा होइन, यो सिंगो महानगर कार्यपालिकाले गर्ने निर्णय हो ।’

महानगरपालिकाभित्रको सार्वजनिक कार्यक्रम गर्न हुन्छ, हुँदैन, कुन बेला गर्नुपर्छ, त्यहाँको संवेदनशीलता के हो ? आदि कुरा हेरेर अनुमति दिने वा नदिने निर्णय गर्दै आएको बताए । स्थानीय सरकारको अनुमति विना कुनै पनि कार्यक्रम हुन नसक्ने उनको भनाइ छ ।

‘जुनसुकै मूल्य चुकाएर, धर्मका नाममा अधर्म गर्न पनि तयार छु भन्ने खालका अभिव्यक्ति दिनु भनेको प्रचलित ऐन नियम कानुन र संविधानविपरीत कुरा हो’ मेयर आचार्यले भने, ‘यस्ता कुरा नबोल्नका लागि सम्बन्धित व्यक्तिलाई अनुरोध गर्दछु ।’

धर्मका नाममा यस्तो अधार्मिक कुरा बोल्नु उपयुक्त नभएको मेयर आचार्यको भनाइ छ । ‘सबैले बिस्तारै बुझ्दै जाने छन् यहाँभित्र के पाक्दैछ भनेर, यो कुनै सोझो कुरा भइरहेजस्तो लाग्दैन अहिले चाहिं’ मेयर आचार्यको भनाइ छ, ‘कोटिहोम गर्ने, पूजा गर्नेजस्तो कुरा, यहायज्ञ गर्ने कुरा त सिधासाधी सबैको बीचमा हुनुपर्ने हो ।’