२०८१ माघ २७ गते १६:१२ 
२७ माघ, काठमाडौं । आगामी फागुन ३ गते काठमाडौंमा नेपाली युवा टोली र चीनको युनान युवा टोलीको बीचमा मैत्रीपूर्ण फुटबल खेल आयोजना हुँदैछ । खेल त्रिपुरेश्वरस्थित दशरथ रंगशालामा हुनेछ ।
चिनियाँ नयाँ वर्षको अवसरमा अखिल नेपाल फुटबल संघ एन्पा को आयोजना र चिनियाँ दूतावासको सहयोगमा मैत्रीपूर्ण फुटबल खेलको आयोजना हुन लागेको हो ।
यस मैत्रीपूर्ण खेलले युवा फुटबलको विकास र फुटबलको माध्यमबाट दुई देशबीचको सम्बन्ध विस्तार गर्ने अपेक्षा रहेको एन्फाले जनाएको छ ।
यस खेलको प्रविधिक पक्षको सबै जिम्मेवारी एन्फाको रहने र खेलसम्बन्धी मार्केटिङ, ब्रोडकास्टिङ, टिकेटिङलगायतका अन्य जिम्मेवारी चिनियाँ दूतावासको रहने जनाइएको छ ।
मैत्रीपूर्ण खेलको अनुमानित बजेट रु ३८ लाख ९० हजार रहेको जनाउँदै एन्फाले खेललाई सफल बनाउन विशेष योगदान पुऱ्याएकोमा चिनियाँ दूतावासलाई विशेष धन्यवाद ज्ञापन समेत गरेको छ ।
खेलको तयारीका लागि मुख्य प्रशिक्षक राजेश शाहीको नेतृत्वमा ४५ नेपाली खेलाडीहरू हाल बन्द प्रशिक्षणमा रहेका छन् ।
प्रतिक्रिया 4