संसद्‌मा बास्कोटा- जनताले ‘भौतिकमन्त्रीको कानमा बतास पसोस्’ भनेका छन्

२९ माघ, काठमाडौं । नेकपा एमालेका सांसद गोकुल बास्कोटाले अरनिको राजमार्ग अन्तर्गत धुलिखेल-खावा खण्ड यथाशीध्र निर्माण सम्पन्न गर्न सरकारको ध्यानाकर्षण गराएका छन् ।

मंगलबार प्रतिनिधिसभा बैठकको शून्य समयमा उनले चारजना प्रधानमन्त्री फेरिए पनि चार किलोमिटर सडक निर्माण नभएको भन्दै सरकारको ध्यानाकर्षण गराएका हुन् ।

त्यहाँका जनता आक्राेशित भएको उल्लेख गर्दै अब पनि सडक निर्माण नगरिए भौतिक पूर्वाधार तथा यातायातमन्त्रीले ढुंगा खाने दिन आउनसक्ने बताए ।

‘चारवटा प्रधानमन्त्री फेरिए । चारैवटा मन्त्री पनि । सचिव कति फेरिए थाहा छैन । खावादेखि धुलिखेलसम्म चार किलोमिटर बाटो बनेन । सभामुखमार्फत भौतिकमन्त्रीको कानमा बतास पसोस् भन्ने माग गर्छु । यही कुरा भन्नु भनेका छन् जनताले । नभए ढुंगा खाने स्थिति बन्यो अब,’ बास्कोटाले भने ।

काभ्रे तरकारीका लागि पकेट क्षेत्र भएको उल्लेख गर्दै कोल्डस्टोर निर्माणका लागि बजेटको व्यवस्था गर्नसमेत माग गरे ।

‘दोस्रो, काभ्रेले काठमाडौंका उपभोक्ताहरूलाई १७ प्रतिशत तरकारी दिन्छ । तरकारीका लागि पटेक क्षेत्रजस्तै छ काभ्रे । त्यसकारण सरकारसँग मिलेर पाँचवटा कोल्डस्टोर सरकारले बनाओस् । अगामी बजेटमा यो व्यवस्था गर्न माग गर्दछु,’ बास्कोटाले भने ।

काठमाडौंकाे मागकाे १७ प्रतिशत तरकारी काभ्रेले धान्दै आएको उनको भनाइ छ ।