लोडसेडिङले सिमेन्टको मूल्यवृद्धि भएको हो : उद्योगमन्त्री

२९ माघ, काठमाडौं । उद्योग, वाणिज्य तथा आपूर्तिमन्त्री दामोदर भण्डारीले सिमेन्ट उद्योगीहरूले आफूखुसी सिमेन्टको मूल्य नबढाएको दाबी गरेका छन् ।

मंगलबार राष्ट्रिय सभाअन्तर्गतको संघीयता सबलीकरण तथा राष्ट्रिय सरोकार समिति बैठकमा बोल्दै उद्योग मन्त्री भण्डारीले यस्तो बताएका हुन् ।

उनले उत्पादन लागतमा वृद्धिको साथै लोडसेडिङको कारण सिमेन्ट उद्योगीहरूले मूल्यवृद्धि गरेको बताए ।

उनले सांसदहरूले लोडसेडिङ छैन भने पनि प्राधिकरणले तालिका बनाएर उद्योगहरूलाई दिएको दाबी गरे । उद्योगमन्त्री भण्डारीले विद्युत् प्राधिकरण सरकारभन्दा बाहिरको निकाय नभएको बताए ।

यो पनि पढ्नुहोस

सिमेन्टको मूल्य वृद्धिबारे छलफल गर्न संसदीय समितिको बैठक आह्वान

उनले उद्योगको लागत मूल्यांकन गर्ने गरी समिति बनाएको बताए । उनले सरकारले सिमेन्टको मूल्यवृद्धि रोक्ने प्रयासले मूल्य वृद्धि घटेको बताए ।

उनले सरकारले उद्योग जोगाउने र मूल्य वृद्धि पनि नियन्त्रण गरी जनतालाई पनि राहत प्रदान गर्ने गरी काम गरिरहेको बताए ।

घाटा खाएर कुनै पनि उद्योगले सिमेन्ट उत्पादन गरेर व्यापार नगर्ने भन्दै उनले सरकारले पटक–पटक उद्योगी, व्यवसायी र निर्माण व्यवसायीहरूसँग यस विषयमा छलफल गरेको बताए ।

सरकारको लगानीमा सञ्चालनमा रहेका उदयपुर र हेटौंडा सिमेन्ट उद्योग पनि सरकारले पूर्णरूपमा सञ्चालन गर्न नसकेको भन्दै उनले भने, ‘सिमेन्ट उद्योगसँग १ सय १५ रुपैयाँ भन्दा बढी मूल्य नबढाउने सहमति हो ।’

यो पनि पढ्नुहोस

सिमेन्ट भाउमा उद्योगीको मिलेमतो, बढाए २० प्रतिशत

‘सिमेन्टको मूल्यवृद्धि लोडसेडिङको कारणले पनि भयो । तामाकोशी बाढीले क्षति हुँदा उत्पादन कम भयो भनेर प्राधिकरणले स्वीकार गरेको छ । उद्योगीहरूले आफूखुसी मूल्य बढाएको होइन,’ उनले भने, ‘उद्योग जोगाउने र मूल्यवृद्धि पनि नियन्त्रण गरी जनतालाई पनि राहत प्रदान गर्ने समितिले निर्देशन गरोस् । सरकारले मान्छ । घाटा खाएर कुनैपनि उद्योगले व्यापार गर्दैन । घरबाट पैसा हालेर सिमेन्ट उत्पादन गरेर बिक्री गर्दैन ।’

समितिमा उद्योगमन्त्री र सांसदहरूबीच दोहोरो संवाद समेत भएको छ । मन्त्रीले सिमेन्टको मूल्यवृद्धि लोडसेडिङको कारणले भएको भनेर समितिमा जानकारी दिएसँगै दोहोरो संवाद भएको हो ।

समिति बैठकमा सांसदहरूले सिमेन्ट उद्योगीहरूले गरेको मूल्यवृद्धिलाई सघाउन नसक्ने मन्त्रीलाई जानकारी गएका थिए ।