शिक्षामन्त्रीलाई सांसद्‌ सुमना श्रेष्ठका ६ प्रश्‍न

३० माघ काठमाडौं। राष्ट्रिय स्वतन्त्र पार्टीकी सांसद सुमना श्रेष्ठले त्रिभुवन विश्वविद्यालयको जग्गा छानबिनको प्रतिवेदन सार्वजनिक गर्न माग गरेकी छिन् ।

बुधबार संसदको शिक्षा, स्वास्थ्य तथा सूचना प्रविधि समितिमा सांसद श्रेष्ठले सोधिन्, ‘जग्गा छानबिनको प्रतिवेदन शिक्षा, स्वास्थ्य तथा सूचना प्रविधि समितिले मागेको छ । तर शिक्षामन्त्रीज्यूले अझै पनि उपलब्ध गराउनु भएको छैन। क-कसले त्रिविको जग्गा अपचलन गर्नुभएछ र ?’

सांसद श्रेष्ठले काठमाडौं विश्वविद्यालयको उपकुलपछि छनोटबारे पनि प्रश्न उठाइन् । ‘काठमाडौ विश्वविद्यालयको उपकुलपति सिफारिस भैसक्यो ? जहिले माथेमा सर जस्ता व्यक्तिले कति झक्झक्याउनु पर्ने हो ?,’उनले प्रश्न गरिन् ।

काठमाडौं विश्वविद्यालयको ‘स्कुल अफ ल’ मा भएको घटनाबारे पनि सांसद श्रेष्ठले प्रश्न गरिन् । काठमाडौ विश्वविद्यालय स्कुल अफ लमा नेविसंघका सदस्यले त्यहाँका विद्यार्थीलाई थर्काउँदा, त्यहाँको प्रशासनले किन उजुरी लिन नमानेको ? विश्वविद्यालयमा विद्यार्थीको सुरक्षा गर्ने जिम्मा कसको हो ? कि विद्यार्थीलाई जेसुकै होस्, हामीलाई बाल् भन्दै क्याम्पसहरू बस्ने हो ?,’ उनले प्रश्न गरिन् ।

सांसद श्रेष्ठले विद्यार्थी नेताले प्रहरीलाई कुटपिट गरेको घटनाका विषयमा शिक्षा मन्त्रालयको जवाफ माग गरिन् । ‘अनेरास्ववियूका विद्यार्थी नेताले प्रहरीलाई कुटपिट गरेर छुट्नेसम्मको वातावरण कसरी सिर्जना हुन्छ? कस्ता नेता जन्माउँदै हुनुहुन्छ,?’ सांसद श्रेष्ठले सोधिन् ।

सांसदले घरमा बालशोषण गरेको विषय पनि सांसद श्रेष्ठले समितिमा प्रवेश गराइन् । ‘के कुनै बच्चालाई विद्यालयमा भर्ना गरेर मात्र पुग्छ ? शिक्षाको हक त्यतिमै सीमित हो ? विद्यालय भर्ना गर्दैमा शिक्षाको हक प्राप्त भयो भनेर मान्न सकिन्छ ? कुनै एउटा सांसद पद सम्हाल्ने व्यक्तिले घरमा बाल शोषण गरेकी बालिकालाई विद्यालय भर्ना गरेर मात्र पुग्छ ?,’ सांसद श्रेष्ठले प्रश्न गरिन् ।

सांसद श्रेष्ठले सीटीईभीटीको उपाध्यक्ष नियुक्तिमा भएको त्रुटिको विषय पनि समिति बैठकमा प्रवेश गराइन् । ‘उपाध्यक्ष नियुक्तिमा कसरी हेल्चेर्क्याईं भयो ? किन अदालतले खारेज गर्ने मौका पायो ?,’ उनले प्रश्न गरिन् ।