निर्यात बढ्यो, व्यापार घाटा कति ?

६ फागुन, काठमाडौं । गत वर्षको तुलनामा यसवर्ष निर्यात उल्लेख्य बढेको छ । साथै आयातमा पनि सामान्य सुधार भएको छ ।

राष्ट्रिय सभामा प्रस्तुत तथ्यांक अनुसार गत पुस महिनासम्मको समीक्षा अवधिमा कूल वस्तु निर्यात अघिल्लो वर्षको सोही अवधिको तुलनामा ३१.८ प्रतिशतले वृद्धि भएर ९८ अर्व ७९ करोड कायम भएको छ ।

गत आर्थिक वर्षको सोही अवधिमा यस्तो निर्यात ७.२ प्रतिशतले कमी आएको थियो ।

समीक्षा अवधिमा कुल वस्तु आयात ७.१ प्रतिशतले वृद्धि भएर ८ खर्ब २२ अर्ब ३७ करोड कायम भएको छ । गत आर्थिक वर्षको सोही अवधिमा कुल वस्तु आयात ३.१ प्रतिशतले घटेको थियो ।

समीक्षा अवधिमा कुल वस्तु व्यापार घाटा ४.४ प्रतिशतले वृद्धि भएर ७ खर्ब २३ अर्ब ५८ करोड कायम भएको छ । अघिल्लो वर्षको सोही अवधिमा यस्तो घाटा २.६ प्रतिशतले घटेको थियो ।

समीक्षा अवधिसम्म विप्रेषण आप्रवाह नेपाली मुद्रामा ४.१ प्रतिशतले वृद्धि भएर ७ खर्ब ६३ अर्ब ८ करोड पुगेको छ । अघिल्लो वर्षको सोही अवधिमा विप्रेषण आप्रवाह २२.२ प्रतिशतले बढेको थियो । समीक्षा अवधिमा शोधनान्तर स्थिति २ खर्ब ४९ अर्व २६ करोडले बचतमा रहेको छ । अघिल्लो वर्षको सोही अवधिमा शोधनान्तर स्थिति २ खर्ब ७३ अर्ब ५२ करोडले बचतमा रहेको थियो ।

२०८१ पुस मसान्तमा कुल विदेशी विनिमय सञ्चिति २०८१ असार मसान्तको २० खर्व ४१ अर्व १० करोडको तुलनामा १३.५ प्रतिशतले वृद्धि भएर २३ खर्व १६ अर्व ८४ करोड कायम भएको छ । २०८१ पुस मसान्तमा कायम कुल विदेशी विनिमय सञ्चितिमा भारतीय मुद्रा सञ्चितिको अंश २४.३ प्रतिशत रहेको छ ।