२०८१ फागुन ६ गते १६:०९ 
६ फागुन, काठमाडौं । नेपाली राष्ट्रिय महिला टोलीकी डिफेन्डर निशा थोकरले अन्तर्राष्ट्रिय महिला फुटबल प्रतियोगिताका बाँकी खेलहरू गुमाउने भएकी छन् । सोमबार कीर्गिस्तानविरूद्धको खेलमा घाइते भएकी उनले बाँकी खेल गुमाउने सम्भावना बढेको हो ।
त्रिपुरेश्वरस्थित दशरथ रंगशालामा भएको विपक्षी खेलाडीसँग ठोक्किँदा उनको टाउकोमा चोट लागेको थियो । त्यसपछि उनलाई नजिकैको ब्लु क्रस हस्पिटलमा लगेर उपचार गरिएको थियो ।
अखिल नेपाल फुटबल संघ (एन्फा) प्रवक्ता सुरेश शाहका अनुसार निशाको सोमबारै उपचारपछि डिस्चार्ज भएको थियो । ‘उनको टाउकोमा चोट लागेको टाँका लगाइएको छ । चिकित्सकले उक्त टाँका नखोलुन्जेल खेल्न नमिल्ने बताउनुभएको छ’ उनले भने ।
हाल निशा रेस्टमा छिन् । एन्फाले यसबारे आधिकारिक धारणा भने सार्वजनिक गरेको छैन ।
नेपालले पहिलो खेलमा कीर्गिस्तानलाई १-० ले पराजित गरेको थियो । अब नेपालले बिहीबार लेबनानसँग दोस्रो खेल खेल्नेछ ।
प्रतिक्रिया 4