प्रधानमन्त्रीलाई नीताको आग्रह : बिन्ती छ, नेपालको इज्जत जोगाइदिनुस्

काठमाडौं । अभिनेत्री नीता ढुंगानाले नेपालको इज्जत जोगाइदिन प्रधानमन्त्री केपी शर्मा ओलीलाई आग्रह गरेकी छन् ।

फेसबुकमार्फत प्रधानमन्त्रीलाई पत्र लेख्दै उनले भारतको ओडिसास्थित भुवनेश्वरस्थित कलिंगा इन्स्टिच्यूट अफ् इन्डस्ट्रियल टेक्नोलोजी (केआईआईटी)मा मृत भेटिएकी नेपालकी २० वर्षिय प्रकृति लम्सालको घटनाको सन्दर्भ पेश गरेकी छिन् ।

उक्त घटनामा नेपालको बेइज्जत गरिएको भन्दै नीताले प्रधानमन्त्रीलाई ओलीलाई प्रश्न गरेकी छन्- अन्तर्राष्ट्रिय मंचमा हामीले कहिलेसम्म यस्तै बेइज्जत खेपिरहनुपर्ने हो ?

नीता अघि लेख्छिन्, ‘अन्तर्राष्ट्रिय मंचमा कहिलेसम्म यस्तै बेइज्जत हामीले खेपिरहनु पर्ने हो ? लगभग यो आरोप यथार्थ पनि हो । नेपालको यो हालत कसले बनायो ? विगत केही बर्षदेखि नेपालको शासक तपाईहरू कांग्रेस, एमाले, माओवादी । अब यो बेइज्जतको जिम्मेवारी तपाईंहरूले लिनुपर्ने कि नपर्ने ? बिन्ती छ नेपालको इज्जत जोगाइदिनुस् । बिन्ती छ नेपाली जनताको भावना बुझिदिनुस् ।’

अहिले आएर आफू अन्योलमा रहेको उल्लेख गर्दै नीता लेख्छिन्, ‘ केही समय यता फोटो खिच्ने र फोटो खिचाउने कामबाहेक, देशको उन्नति प्रगति र देशमा के भइरहेको छ, हामीले हजुरको आफ्नो प्रोफाइलबाट केही देख्न पाएका छैनौँ । कुनै समय हाम्रो देशको प्रधानमन्त्री केपी शर्मा ओलीज्यू जस्तै हुनुपर्छ भनेर ठाटले भन्ने म कलाकार आज अन्योलमा छु ।’

उनी लेख्छिन्, ‘मलाई पनि हजुरसँग वार्तालाप गर्न मन छ, भेट्न मन छ । फोटो खिचाउन मन छ तर सँगसँगै धेरै प्रश्नहरु छन् ।’

नीताले प्रधानमन्त्री ओलीको फोटो सेयर गर्दै उक्त स्टाटस लेखेकी हुन् । कामको कुरा गर्दा, नीताले निर्माण गरेको फिल्म ‘ह्रस्वदीर्घ’ हालै रिलिज भएको थियो । यो फिल्मलाई दक्षिण भारतमा समेत प्रदर्शनको तयारी छ ।