गुल्मीको मालिका गाउँपालिकाको मोटरसाइकल २ हप्तादेखि सडकमै

७ फागुन, गुल्मी । गुल्मीको मालिका गाउँपालिकाका एक कर्मचारीले चलाउँदै आएको मोटरसाइकल करिब २ हप्तादेखि सडकमै बेवारिसे छ । सरकारी नम्बर प्लेटको उक्त मोटरसाइकल ती कर्मचारीले माघ २४ गतेदेखि सडकमै छोडेर हिँडेपछि बेवारिसे बनेको हो ।

कच्ची सडकको छेउमा थन्किएको उक्त लु १ ब ८७७ नम्बरको मोटरसाइकल वडानम्बर–१ नेटा वडा कार्यालय सहायक सुनिल थापाले प्रयोग गर्दै आएका थिए । घरदेखि वडाकार्यालय जाने क्रममा मोटरसाइकल बिग्रिएकाले सडकमै छोडेको उनको तर्क छ ।

आफूले मोटरसाइकल मर्मतका लागि मिस्त्रीलाई फोन गरेको तर, मिस्त्रीले शनिबार बाहेका अन्य समयमा नभ्याउने बताएकाले त्यहीं छोडेर हिँडेको कार्यालय सहायक थापा प्रष्टीकरण दिन्छन् । ‘त्यसै दिन काम विशेषले काठमाडौं जानुपर्ने भएकाले कार्यालयलाई मोटरसाइकल बिग्रिएको बारे जानकारी गराएरै गएको हुँ’, उनले भने ।

आफूले स्थानीयको घरअगाडि सुरक्षित स्थानमा मोटरसाइकलाई छोडेर गएको तर, त्यस बीचको समयमा स्थानीयले अन्यत्र सारिदिएर फोटो खिचेको भन्दै थापाले उल्टै आरोप लगाए ।

सरकारी साधनको दुरुपयोग गरेको भन्दै त्यहाँका स्थानीय आक्रोशित समेत बनेका छन् । सार्वजनिक स्रोतबाट किनिएका सवारी साधनको व्यवस्थापन र प्रयोगमा गाउँपालिकाको ध्यान नपुगेको स्थानीयको आक्रोश छ । वडाध्यक्ष दीपक श्रीषले कार्यालय सहायक थापा कार्यालय आउने समयमा मोटरसाइकल सडकमै बिग्रेर त्यहाँ छोडेर गएको र स्थानीय खबर गरेपछि मात्रै आफूले थाहा पाएको उनले बताए ।

तर, मालिका गाउँपालिकामा सरकारी सवारी साधनको दुरुपयोग भएको यो पहिलो घटना भने होइन । यसअघि पनि पटकपटक सवारी साधन दुरुपयोग भएको भिडियो र फोटा सामाजिक सञ्जालमा आएका थिए ।

गत कात्तिक २० गते मालिका गाउँपालिकाकै लु १ झ ७८६ सेतो नम्बर प्लेटको डबल क्याप जीप पालिकाको केन्द्र नजिकै सडकै फसेको अवस्थामा छोडिएको थियो । कात्तिक १९ गते राति गाउँपालिका वडानम्बर–४ स्थित भ्यागुते खोला र खालडाडा बीच सडकको खाल्डोमा फसेको थियो ।

खाल्डोमा फस्दा त्यस सवारीको पछिल्लो एक साइडको टायर नै पड्किएको थियो ।  स्थानीयका अनुसार त्यस राति उक्त सवारी गाउँपालिकाकै जनप्रतिनिधिले चलाएका थिए ।

उक्त सवारी अवस्था सहितको भिडियो अहिले पनि सामाजिक सञ्जाल फेसबुकमा हेर्न सकिन्छ । गाउँपालिका उपाध्यक्ष उपेन्द्र अर्याल चढ्दै आएको सवारीमा त्यतिबेला समस्या आएर मर्मत गरिएको गाउँपालिकाका प्रमुख प्रशासकीय अधिकृत कमलबहादुर क्षेत्री बताउँछन् ।

सवारी मर्मतमा भएको खर्चबारे आर्थिक प्रशासन शाखामा बुझ्नु पर्ने उनले बताए । उनले केही दिनदेखि सडकमै रहेको सवारीबारे आफू जानकार नभएको बताए । उनले सरकारी सम्पत्तिको दुरुपयोग गर्ने अधिकार कसैलाई नभएको र त्यस्तो गैरकानुनी काम गर्नेलाई तत्काल छानविन गरेर कारबाही गरिने प्रमुख प्रशासकीय अधिकृत क्षेत्रीले उल्लेख गरे । उनका अनुसार सडकमा बेवारिसे बनेको मोटरसाइकलाई तुरुन्तै पालिकामा ल्याउन भनिएको छ ।

सरकारी मोटरसाइकललाई गैर जिम्मेवार बनेर दुरुपयोग गरेको खुलेमा स्वयं चढ्दै आएका कर्मचारीको तलबबाटै मर्मत गरिने क्षेत्रीले बताए ।