२०८१ फागुन ८ गते ७:०९ 
८ फागुन, काठमाडौं । इंग्लिस प्रिमियर लिग फुटबलअन्तर्गत गएराति भएको खेलमा शीर्षस्थानको लिभरपुल र एस्टन भिल्लाले बराबरी खेलेका छन् । भिल्लाको मैदानमा भएको खेल २-२ को बराबरीमा सकिएको हो ।
सुरुमा लिभरपुलले अग्रता लिएको खेलमा एस्टन भिल्लाले पुनरागमन गर्दै अग्रता बनाएपनि जोगाउन नसक्दा २ अंक गुमायो । लिभरपुलले गुमाएको अग्रतालाई बराबरी गर्दै हारबाट जोगियो ।
खेलको २९औं मिनेटमा मोहमद सालाहले गोल गर्दै लिभरपुललाई अग्रता दिलाएका थिए । ३८औं मिनेटमा युरी टिलेमन्सले गोल गर्दै खेल बराबरीमा ल्याए । इन्जुरी समयमा ओली वाट्किन्सले गोल गर्दै पहिलो हाफमै घरेलु टोलीलाई अगाडि राखे ।
दोस्रो हाफको ६१औं मिनेटमा ट्रेन्ट एलेक्जेन्डर आर्नोल्डले गोल गर्दै खेल पुन: बराबरीमा ल्याए । त्यसपछि थप गोल हुन नसक्दा दुवै टोलीले अंक बाँडेका हुन् ।
बराबरीपछि लिभरपुल २६ खेलबाट ६१ अंकसहित शीर्षस्थानमा यथावत् छ । एस्टन भिल्ला ३९ अंकसहित नवौं स्थानमा छ ।
प्रतिक्रिया 4