+
+
Shares

नेपालमा गरेको सहयोगलाई ट्रम्पले ठगी भनिदिए, अब सतर्क बनौं : शेखर कोइराला

‘देशको राजनीतिक र आर्थिक अवस्था नाजुक बन्यो, परिस्थिति गम्भीर छ’

‘अहिले नेपालको राजनीतिक परिस्थिति अत्यन्त गम्भीर अवस्थामा छ । अत्यन्त गम्भीर अवस्थामा छ नेपाल । झन् अहिले आर्थिक अवस्था त नाजुक अवस्थामा छ,’ कोइरालाले भने ।

अनलाइनखबर अनलाइनखबर
२०८१ फागुन ८ गते १३:३४

८ फागुन, काठमाडौं । सत्तारुढ दल नेपाली कांग्रेसका नेता डा. शेखर कोइरालाले देशको राजनीतिक र आर्थिक सुधारको अवस्था अत्यन्तै नाजुक अवस्थामा पुगेको टिप्पणी गर्दै सतर्क भएर अघि बढ्नुपर्ने बेला आएको बताएका छन् ।

बिहीबार सुर्खेत पुगेका नेता कोइरालाले सञ्चारकर्मीसँगको कुराकानीका क्रममा अमेरिकाले रोकेका सहयोग परियोजनाका कारण अझै धेरै सतर्क हुनुपर्ने अवस्था आएको जिकिर गरे ।

अमेरिकी राष्ट्रपति डोनाल्ड ट्रम्पले नेपालमा भइरहेका अमेरिकी परियोजनाहरू रोकिएसँग नेपालले पनि पुनर्विचार गर्नुपर्ने बताए ।

‘अहिले नेपालको राजनीतिक परिस्थिति अत्यन्त गम्भीर अवस्थामा छ । अत्यन्त गम्भीर अवस्थामा छ नेपाल । झन् अहिले आर्थिक अवस्था त नाजुक अवस्थामा छ । यही बेला अमेरिकाको राष्ट्रपतिले जुन पैसा दिएको छ त्यसलाई फ्रड (ठगी) भनिदिनुभएको छ,’ कोइरालाले सञ्चारकर्मीसँग कुराकानी गर्दै भने ‘तीन महिनाका लागि त रोकेको छ, त्यो रकम । कति रोक्नुहुन्छ, दिनुहुन्छ वा दिँदै दिनुहुन्न त्यो भोलिको कुरा हुन्छ । तर, हामीले पनि एउटा के कुरा बुझ्नुपर्छ भने अब बेल्ट टाइट गरेर अगाडि बढ्नुपर्ने अवस्था छ ।’

अमेरिकी सहयोग नियोग (यूएसएड) को सहयोगमा सञ्चालित सहयोग कार्यक्रम अमेरिकी राष्ट्रपति ट्रम्पले तत्कालका लागि रोकेका छन् ।

यसबारे थप चर्चा गर्दै कोइरालाले भनेका छन्, ‘यूएसडको बारेमा मेरो भिन्नै ओपिनियन (विचार) छ । अब हामी सतर्क हुनुपर्छ । शिक्षा, स्वास्थ्यमा ४०/५० वर्षदेखि सहयोग गरिरहेको छ । अहिले पनि सपोर्ट गरेरै जानुपर्छ ।’

त्यस्तै, अमेरिकी सहायता नियोग मिलेनियम च्यालेञ्ज कर्पोरेसन (एमसीसी)को अनुदान पनि रोकिएको छ ।

यस्ता विषयमा भने सरकारले पुनर्विचार गर्न सक्नुपर्ने कोइरालाको भनाइ थियो । ‘तर, अरु धेरै शीर्षक जुन छ, त्यसमा नेपाल सरकारले रि थिंक (पुनर्विचार) गर्न सक्नुपर्छ,’ उनले भने ।

यस्तो विषयमा संयमित भएर अघि बढ्दा मात्रै राष्ट्रलाई फाइदा पुग्ने कोइरालाको भनाइ थियो ।

फरक प्रसंगमा कोइरालाले अहिले देशमा आर्थिक सुधार नाजुक अवस्थामा भएको, सुशासन हुँदै नभएको जस्तो देखिएको बताए ।

‘आर्थिक सुधारको अवस्था अत्यन्तै नाजुक अवस्थामा छ । सुशासन छँदै छैन भनेपनि हुन्छ । त्यो अवस्थाबाट देश गइरहेको अवस्थामा दुई ठूला दल एक ठाउँमा उभिएका छौं,’ कोइरालाले भने, ‘राजनीतिक स्थिरता, आर्थिक विसंगतिलाई राम्रो बनाउन र सुशासनलाई अघि बढाउन मिलेका हौं ।’

उनले केही मान्छेहरू दुई ठूला दल मिल्दा निरंकुशता हुने भन्दै टिप्पणी गरिरहेको भन्दै उक्त विषय स्वभाविक भएको पनि बताए ।

‘एकथरी साथीहरूको भनाइ दुई ठूला दल मिल्दा निरंकुशता हुन्छ भन्नुहुन्छ, त्यो स्वभाविक पनि हो । निरंकुशताबाट रोक्नका लागि जो सरकारमा हुनुहुन्छ, कर्णाली प्रदेशमा पनि नेपाली कांग्रेस र नेकपा एमाले सरकारमा छन्, जो बाहिर साथीहरू छन् उहाँहरूले खबरदारी गर्दै गर्नुपर्‍यो,’ कोइरालाले भने ।

आफूहरू केन्द्रमा खबरदारी गरिरहेको सुनाउँदै उनले प्रदेशमा पनि सत्ताबाट भइरहेका नराम्रा कामहरूको विरोध गर्न कार्यकर्ताहरूलाई निर्देश गरे ।

‘हामी केन्द्रमा खबरदारी गरिरहेका छौं । भोलि एमालेको प्रतिनिधि को हुन्छ, कर्णाली प्रदेशमा नेपाली कांग्रेस । मन्त्रीहरूले त मिलेरै जानुपर्छ,’ उनले भने, ‘तर जो हामी बाहिर छौं, जो सरकारमा छैनौं, तर सत्तामा छौं । उनीहरूलाई खबरदारी गरिएन भने भोलि निरंकुशतातिर जानसक्छ कि भन्ने चिन्ता लागेको हो ।’

यो खबर पढेर तपाईलाई कस्तो महसुस भयो ?
Khusi chhu

खुसी

Dukhi chhu

दुःखी

Achammit chhu

अचम्मित

Utsahit Chhu

उत्साहित

Akroshit Chhu

आक्रोशित

प्रतिक्रिया

भर्खरै पुराना लोकप्रिय
Advertisment

छुटाउनुभयो कि ?