२०८१ फागुन ९ गते १२:१४ 
९ फागुन, काठमाडौं । युवा मिडफिल्डर रोहन कार्की काठमाडौं रेजर्सको मार्की खेलाडी बनेका छन् ।
नेपाल सुपर लिग (एनएसएल) को तेस्रो संस्करणका लागि पूर्व च्याम्पियन काठमाडौं रेजर्सले रोहनलाई मार्की खेलाडीमा अनुबन्ध गरेको हो ।
गत वर्ष भएको दोस्रो संस्करणमा धनगढी एफसीबाट खेलेका रोहन एनएसएलको उदियमान खेलाडी घोषित भएका थिए ।
राष्ट्रिय टिमबाट डेब्यु समेत गरिसकेका रोहल हाल ए डिभिजन क्लब चर्च ब्वाइजबाट विभिन्न नकआउट फुटबल प्रतियोगिताहरु खेलिरहेका छन् ।
गत वर्ष नै राष्ट्रिय टिममा स्थान बनाएका रोहनले कात्तिकमा ताजिकिस्तान विरुद्धको खेलबाट राष्ट्रिय टोलीमा डेब्यु गरेका थिए ।
डुसानवेस्थित सेन्ट्रल रिपब्लिक रंगशालामा भएको खेलमा रोहनले पहिलो रोजाईमा खेल्दै डेब्यू गरे । गत फागुनमा मलेसियाविरुद्धको मैत्रीपूर्ण खेल र बहराइनविरुद्धको विश्वकप छनोट खेलका लागि टिममा परेका रोहनले डेब्यूका लागि भने केही समय पर्खनुपरेको थियो ।
झापाको कन्काई नगरपालिका-३ सुरुङ्गाका रोहनले आरसी ३२ फुटबल एकेडेमीबाट सी डिभिजन छनोट र सी डिभिजन खेलेका थिए । त्यसअघि उनले सरस्वती युथ क्लबबाट ललित स्मृति यू-१८ च्याम्पियनसिप खेलेका थिए भने झापा फुटबल क्लबबाट सी डिभजन छनोट पनि खेलेका थिए ।
काठमाडौं रेजर्सले युवा खेलाडीहरुलाई मौका दिने उदेश्यले रोहनलाई मार्की प्लेअरमा अनुबन्ध गरेको जनाएको छ ।
काठमाडौं तीन सिजनमा तीन फरक मार्की खेलाडी बनाएको छ । पहिलो सिजनमा गोलकिपर विकेश कुथु काठमाडौंको मार्की खेलाडी थिए । उनकै कप्तानीमा काठमाडौंले पहिलो सिजनकै उपाधि जितेको थियो । यस्तै दोस्रो सिजनमा युवा फरवार्ड हिसुब थपलियालाई काठमाडौंले मार्की बनाएको थियो । तर हाल हिसुब नेपाल छाडेर अष्ट्रेलिया पलायन भइसकेका छन् ।
पछिल्लो समय नाम चलेका खेलाडीहरु विदेशिन थालेपनि एनएसएलका फ्रेन्चाइज टोलीले पनि युवा अनुहारहरुलाई मार्की बनाएको हो ।
प्रतिक्रिया 4