नेपालमा पहिलो पटक क्यानोनिङ उत्सव हुँदै

९ फागुन, काठमाडौं । नेपालमा पहिलोपटक क्यानोनिङ उत्सव हुने भएको छ । सिन्धुपाल्चोकको गातीस्थित बोर्डरल्याण्डमा यही फागुन १६ देखि १८ सम्म तीनदिने क्यानोनिङ उत्सव हुने भएको हो ।

बोर्डरल्याण्ड इको रिसोर्टले आयोजना गर्न लागेको यो उत्सव विशेषगरी साहसिक खेलमा रुचि राख्ने नेपालीहरूलाई लक्षित गरिएको छ । पर्वतारोहण, पदयात्रा, र्‍याफ्टिङ, प्याराग्लाइडिङ, माउन्टेन बाइकिङ तथा मह संकलनजस्ता रोमाञ्चक गतिविधिहरू समेटिएको क्यानोनिङ उत्सव साहसिक पर्यटकहरूको आकर्षण बन्ने अपेक्षा गरिएको छ ।

नेपालमा क्यानोनिङका लागि विभिन्न स्थानहरू प्रसिद्ध छन् । जसमध्ये काठमाडौंको सुन्दरीजल, सिन्धुपाल्चोकको पुरानो जम्बो, पोखरा र चितवनको जलबिरे प्रमुख हुन् । नेपाल नदी संरक्षण (एनआरसिटी)का अध्यक्ष तथा कर्णाली रिभर वाटरकिपरसमेत रहेका बोर्डरल्याण्ड इको रिसोर्टका सञ्चालक मेघ आले उत्सवका क्रममा सञ्चालन गरिने विभिन्न साहसिक खेलहरुमा सहभागीहरुको सुरक्षालाई प्राथमिकतामा राखिएको बताए।

‘क्यानोनिङ गर्दा पानीको बहाव, भौगोलिक स्थिति र खेलाडीहरूको सुरक्षामा विशेष ध्यान दिएका छौं । वसन्त ऋतुमा नेपालमै पहिलोपटक व्यापक कार्यक्रमसहित क्यानोनिङ उत्सव अयोजना गर्दै छौं,’ उनले भने ।

नेपालका नौ वटा क्यानोनिङ गर्न मिल्ने झरनाहरु सिन्धुपाल्चोकमा रहेको उनले बताए । यी झरनालाई प्रवद्र्धन गर्न महोत्सव आयोजना गर्न लागिएको उनको भनाइ छ । ‘यो उत्सवमा करिब डेढ सयदेखि २०० को हाराहारीमा आन्तरिक पर्यटकहरुको सहभागिता रहने अपेक्षा लिएका छौं,’ आलेले भने ।

उनका अनुसार नेपालमा साहसिक खेलहरू दिनप्रतिदिन लोकप्रिय बन्दै गइरहेका छन् । साहसिक खेलप्रेमीहरूका लागि पर्वतारोहण, पदयात्रा, र्‍याफ्टिङ मात्र नभई क्यानोनिङ पनि आकर्षक गन्तव्य बन्दै गएको उनको अनुभव छ । यसमा आन्तरिक तथा बाह्य पर्यटकहरूको उल्लेखनीय सहभागिता रहने अपेक्षा गरिएको छ । ‘साहसिक खेलप्रति बढ्दो आकर्षणले आगामी दिनमा यस क्षेत्र अझै व्यावसायिक हुने आशा जगाएको छ,’ आलेको भनाइ छ ।

नेपालमा क्यानोनिङको व्यवसायिक यात्रा सन् १९९६ मा सुरु भएको इतिहास छ । फ्रान्सबाट सुरु भएको क्यानोनिङ वाटरकिपर एवं बोर्डरल्याण्डका सञ्चालक आलेले अस्ट्रियामा तालिम लिएर नेपालमा भित्र्याएका हुन् । प्रारम्भमा विदेशी प्रशिक्षकहरूमार्फत सिकाइएको यो खेल अहिले नेपाली साहसिक खेलाडीहरूमाझ लोकप्रिय बन्दै गएको छ ।

कार्यक्रम निर्देशक मदन मगरका अनुसार र्‍याफ्टिङ गर्दा वाक्क हुनेहरूका लागि क्यानोनिङ उत्कृष्ट विकल्प हुन सक्छ । डोरीको नट र पौडिन चाहनेहरुका लागि यो खेल रोमाञ्चकमात्र नभई सुरक्षितसमेत हुने उनी बताउँछन् ।

सुरुवातमा विदेशी पर्यटकहरूको मात्र रुचि रहेको क्यानोनिङ अहिले नेपालीहरूमा पनि आकर्षण बढ्दै गएको मगरको भनाइ छ । यसलाई नेपाल क्यानोनिङ एसोसिएसनले व्यवस्थित गर्दै व्यावसायिक बनाउने प्रयास गरिरहेको उनले बताए ।

निर्देशक मगरले यस कार्यक्रमका लागि १० देखि १५ जना क्यानोनिङ गाइड तथा २५ जना स्वयंसेवक खटाइने जानकारी दिए । कार्यक्रममा सहभागीहरुलाई पूर्ण मनोरञ्जनको प्याकेज उपलब्ध गराइने आयोजकको प्रतिबद्धता छ ।

‘सहभागी हुन चाहनेले बोर्डरल्याण्ड इको रिसोर्टको फेसबुक पेज, इन्स्टाग्रामको पेज वा नयाँ बजार र ठमेलमा रहेको कार्यालयमा नाम दर्ता गराउन सक्नुहुने छ,’ निर्देशक मगरले भने ।